Расман. Бектемир Мелиқўзиевнинг жанги тасдиқланди
Профессионал бокснинг суперўрта вазн тоифасида фаолият юритувчи чарм қўлқоп устамиз Бектемир Мелиқўзиев рингга қайтмоқда.
Ҳамюртимиз аввал хабар берилганидек, 30 май куни Лас-Вегас шаҳридаги Virgin Hotels мажмуасида ташкил этиладиган проф бокс оқшомида иштирок этади. 29 яшар Мелиқўзиевга ўша куни америкалик Дариус Фулгхем рақиблик қилади. Жанг суперўрта вазн тоифасида, WBA Eliminator мақомида ўтказилади. Ушбу тўқнашув ғолиби кейинги жангига айнан чемпионлик камари учун ўтади. Мелиқўзиев айни дамда ушбу ташкилот рейтингда учинчи ўринни эгаллаб турган бўлса, Фулгхем тўртинчи поғонада бормоқда.
Суперўрта вазнда мексикалик Саул Алварес WBA Super камари соҳиби бўлса, Калеб Плант вақтинчалик камарга эгалик қилади. Шунингдек, Увел Эрнандес WBA Gold чемпиони ҳисобланади.
Маълумот учун, Бектемир Мелиқўзиев фаолияти давомида 16 та жанг ўтказиб, 15 ғалаба (10 KO) ва 1 та мағлубият қайд этган. Дариус ҳисобида эса 14 та жангда қўлга киритилган 14 та ғалаба (12 KO) бор.
