Баходир Жалолов профессионал рингдаги навбатдаги жангини 17 октябрь куни ўтказади
Профессионал бокснинг супер оғир вазн тоифаси вакили, ўзбекистонлик Баходир Жалолов профессионал рингдаги навбатдаги жангини 17 октябрь куни ўтказади. Унинг рақиби британиялик Соломон Дакрес бўлади.
Машҳур инсайдер Дэн Рафаэлнинг хабарига кўра, Жалолов 17 октябрь куни Лондон шаҳридаги “O2 Arena”да ўтказиладиган Даниэль Дюбуа — Фабио Уордли жанги кечасида рингга кўтарилади. Жалолов — Дакрес жанги асосий жанг олдидан ўтказиладиган баҳслардан бири бўлиши кутилмоқда.
Томонлар жангни ўтказиш бўйича келишувга эришган. Жалоловнинг промоутери — Top Rank, Дакреснинг промоутери эса Queensberry компанияси ҳисобланади.
32 ёшли Баходир Жалолов профессионал боксда мағлубиятсиз фаолият юритмоқда. У профессионал боксда 17 та жанг ўтказиб, шуларнинг 15 тасини муддатидан аввал якунлаган.
Жалолов сўнгги жангини 9 май куни Манчестерда ўтказган. Ўшанда у хорватиялик Агрон Смакични нокаутга учратганди.
Унинг рақиби Соломон Дакрес профессионал боксда 10 та ғалаба ва битта мағлубият қайд этган. Британиялик боксчи ушбу жангларнинг учтасида рақибларини нокаут билан мағлуб этган.
Бундан ташқари, ўзбекистонлик спортчи ҳаваскор боксда ҳам катта натижаларга эришган. У 2020 ва 2024 йилларда Олимпия ўйинлари чемпиони бўлган. Шунингдек, 2019 ва 2023 йилларда Жаҳон чемпионлигини қўлга киритган.
