Жеко хайрлашди: терма жамоалар тарихидаги энг яхши тўпурарлар кимлар?
Босния ва Герцеговина терма жамоасининг афсонавий ҳужумчиси Эдин Жеко миллий жамоадаги фаолиятини якунлади. 39 ёшли форварднинг кетиши терма жамоалар тарихида энг кўп гол урган футболчилар рейтингига яна бир бор эътибор қаратди. Қуйида терма жамоа сафида энг кўп гол урган йигитлар ҳақида сўз юритамиз.
10. Робби Кин — Ирландия, 68 гол
Робби Кин Ирландия терма жамоасининг ҳақиқий афсонаси ҳисобланади. У 18 йил давомида миллий жамоа шарафини ҳимоя қилди ва 146 та учрашувда 68 та гол урди.
Голларидан кейинги машҳур акробатик сальтолари билан мухлислар ёдида қолган Кин клублар даражасида ҳам катта из қолдирди. У «Лидс», «Тоттенхэм» ва «Ливерпуль» каби жамоаларда тўп тепган.
9. Герд Мюллер — Германия, 68 гол
Герд Мюллернинг статистикаси эса янада ҳайратланарли: у Германия терма жамоаси сафида атиги 62 та ўйинда 68 та гол урган.
Жаҳон чемпиони ва «Олтин тўп» соҳиби бўлган Мюллер 1972 йилги Европа чемпионати финалида СССР терма жамоаси дарвозасига икки марта гол урган. 1974 йилги Жаҳон чемпионати финалида эса Нидерландияга қарши ҳал қилувчи голни киритиб, Германияга жаҳон чемпионлигини олиб берган.
Мюллер бўйи баланд ёки ташқи кўриниши билан ажралиб турмасди. Аммо жарима майдонидаги сезгирлиги ва вазиятни олдиндан ҳис қила билиши уни футбол тарихидаги энг буюк ҳужумчилардан бирига айлантирди.
8. Мирослав Клозе — Германия, 71 гол
Клозе Германия терма жамоасида 137 та учрашув ўтказиб, 71 та гол урган. У Мюллернинг рекордини янгилаган ва 2014 йилда Германия билан жаҳон чемпиони бўлган.
«Бавария»нинг собиқ ҳужумчиси терма жамоадаги фаолияти давомида марказий ҳужумчи позициясини юқори даражада эгаллаб келди. У голларидан кейинги сальтолари билан ҳам машҳур эди.
7. Эдин Жеко — Босния ва Герцеговина, 73 гол
Жеко — Босния ва Герцеговина футболининг энг буюк юлдузларидан бири. У миллий жамоа сафида 152 та ўйинда 73 та гол урди.
Жеко терма жамоаси билан йирик мусобақаларда иштирок этган ва бир неча бор жамоасини муҳим учрашувларга етаклаган.
Клублар даражасида эса у «Вольфсбург», «Манчестер Сити» ва Италиянинг бир қатор грандлари сафида тўп тепди. Жорий ёзда эса «Шальке»га кўчиб ўтди.
Энди Жеко терма жамоадаги фаолиятини якунлади.
6. Шандор Кочиш — Венгрия, 75 гол
Венгрия футболининг афсоналаридан бири Шандор Кочиш 68 та учрашувда 75 та гол урган.
У 1954 йилги Жаҳон чемпионатида 11 та гол билан мусобақа тўпурари бўлган. Венгрия финалгача етиб борган, аммо ҳал қилувчи баҳсда Фриц Вальтер бошчилигидаги Ғарбий Германияга 2:3 ҳисобида мағлуб бўлган. Бу учрашув футбол тарихига «Берндаги мўъжиза» номи билан кирган.
Кочиш миллий жамоада 100 та гол уришга биринчи бўлиб яқинлашган футболчилардан бири эди.
5. Ференц Пушкаш — Венгрия, 84 гол
Ференц Пушкаш — нафақат Венгрия, балки жаҳон футболи тарихидаги энг буюк ҳужумчилардан бири.
У Венгрия терма жамоаси сафида 89 та учрашувда 84 та гол урган. Пушкаш 1954 йилги Жаҳон чемпионати финалида Германияга қарши майдонга тушган, аммо венгрлар кутилмаган мағлубиятга учраган.
Кейинчалик Пушкаш «Реал»нинг буюк юлдузларидан бирига айланди ва Альфредо Ди Стефано билан бирга мадридликлар тарихида алоҳида ўрин эгаллади. У Испания терма жамоаси сафида ҳам 4 та ўйин ўтказган, аммо гол ура олмаган.
4. Харри Кейн — Англия, 87 гол
Англия терма жамоасининг амалдаги энг сермаҳсул футболчиси — Харри Кейн.
У 123 та учрашувда 87 та гол урган ва Уэйн Рунининг аввалги рекордини янгилаган. Кейн Англиянинг бир неча йирик мусобақаларида жамоа капитани ва асосий ҳужумчиси бўлди.
«Тоттенҳэм»даги узоқ йиллик фаолиятидан сўнг Кейн «Бавария»га кўчиб ўтди. У клуб даражасида ҳам юқори натижалар қайд этишда давом этмоқда.
3. Роберт Левандовски — Польша, 92 гол
Польша терма жамоаси тарихидаги энг яхши тўпурар — Роберт Левандовски.
У миллий жамоа сафида 92 та гол урган. Левандовски бир неча йил давомида жаҳон футболидаги энг кучли ҳужумчилардан бири сифатида эътироф этилди.
«Бавария» билан кўплаб совринларни қўлга киритган футболчи кейинчалик «Барселона»га ўтди. Фаолиятининг сўнгги босқичида эса у АҚШнинг «Чикаго Файр» клубига кўчиб ўтди.
Левандовски Польша терма жамоасида ҳамон муҳим фигуралардан бири бўлиб қолмоқда.
2. Ромелу Лукаку — Бельгия, 94 гол
Бельгия терма жамоасининг энг сермаҳсул футболчиси Ромелу Лукаку ҳисобида 94 та гол бор. У миллий жамоа сафида 134 та учрашув ўтказган.
Лукаку ёшлигиданоқ жисмоний имкониятлари билан тенгдошларидан ажралиб турган. У «Эвертон», «Манчестер Юнайтед», «Челси» ва бошқа клубларда тўп тепган.
Клублар даражасида турли жамоалар сафида фаолият юритганига қарамай, Лукакунинг Бельгия терма жамоасидаги кўрсаткичлари алоҳида эътиборга лойиқ.
1. Криштиану Роналду — 146 гол
Терма жамоалар тарихидаги энг яхши тўпурар — Криштиану Роналду.
Португалиялик суперюлдуз миллий жамоа сафида 234 та учрашувда 146 та гол урган. Бу натижа уни нафақат Европа, балки бутун жаҳон терма жамоалари тарихидаги энг сермаҳсул футболчига айлантирган.
Роналду Португалия билан Европа чемпионатида ғолиб чиққан ва миллий жамоа тарихидаги энг муҳим футболчилардан бирига айланган.
Унинг натижаси ҳозирча жуда катта фарқ билан биринчи ўринда турибди. Бироқ Килиан Мбаппе, Эрлинг Холанд ва бошқа ёш голеадорлар унинг рекордига яқинлашиш учун ҳали кўп йилларга эга.
