«Тоттенҳэм» янги мавсумга катта шовқинлар билан кириб келмоқда. Клуб ҳақида нималарни биламиз?
«Тоттенхэм» бу ёзда АПЛдаги эҳтимол энг шов-шувли трансферни амалга оширди. Инсайдерлар Дэвид Орнштейн ва Фабрицио Романонинг хабар беришича, лондонликлар «Ньюкасл» билан Италия терма жамоаси ярим ҳимоячиси Сандро Тоналининг 117 миллион евро эвазига трансфери борасида келишувга эришди. Келишув клуб учун рекорд ва лига тарихидаги энг йирикларидан бири бўлади.
Сандро Де Дзербини кўндирди
Орнштейннинг маълумотига кўра, клублар 26 ёшли футболчининг трансфери шартларини тўлиқ келишиб олишди. Трансфернинг умумий суммаси 117 миллион еврони ташкил этади, шундан 108 миллион дарҳол тўланади, яна 9 миллиони эса бонус сифатида кўзда тутилган.
Романонинг хабар беришича, футболчи билан шахсий шартнома ҳам келишилган. Бу трансфер ойнасида италиялик футболчи учун жиддий кураш кечди. «Манчестер Сити», «Манчестер Юнайтед» ва «Арсенал» қизиқиш билдирган, бироқ айнан «Тоттенхэм» ҳам «Ньюкасл»ни, ҳам футболчининг ўзини кўндира олди. Қайд этилишича, шартнома имзоланишида «шпорлар» бош мураббийи Роберто Де Дзерби ҳал қилувчи рол ўйнаган — у шахсан Сандрони ўз клубига ўтишга кўндирган.
Тонали 2023 йилнинг ёзидан бери «Ньюкасл»да ўйнаб келаётган эди: ўшанда инглиз клуби уни «Милан»дан 60 миллион евродан ортиқроққа сотиб олганди. Ярим ҳимоячи Эдди Хаунинг кучайиб бораётган жамоаси учун кучли қўшимча бўлиши керак эди, аммо биринчи мавсумдаёқ футболчининг фаолияти тўхтатиб қўйилди.
Хавбек ҳали «россонерилар» сафида ўйнаб юрган вақтларида қилган пул тикишлари учун ўн ойлик дисквалификация олди. Бундан ташқари, The Guardian хабар берганидек, унга қиморга қарамликдан даволаниш ва ёш футболчилар учун тотализаторнинг зарари ҳақида камида 16 та маъруза ўтказиш мажбурияти юклатилди.
Қайтгач, Тонали «Ньюкасл» таркибида ўрнини мустаҳкамлай олди ва Европадаги энг кучли марказий ярим ҳимоячилардан бири бўлиб қолаётганини исботлади. Италиялик футболчи инглиз клуби сафида 110 та ўйин ўтказиб, 10 та гол урди ва 10 та голли узатмани амалга оширди.
Ўтган мавсумда у 53 марта майдонга тушди: уч марта гол урди ва етти марта жамоадошларига ассистентлик қилди. Сандронинг трансфер бозоридаги нархи ўз амплуасидаги ўйинчилар орасида энг юқориларидан бири бўлиб қолаверди.
«Тоттенхэм» рекорди
Премьер-лигада кетма-кет икки марта 17-ўринни эгаллаганидан сўнг, лондонликлар раҳбарияти янги мавсум олдидан таркибни янгилашга жиддий эътибор қаратди.
Тоналини, бизга маълумки, 117 миллионга сотиб олишмоқда. Transfermarkt маълумотларига кўра, АПЛ клубларига фақат тўрт нафар футболчи бундан қимматроққа тушган: Александер Исак ва Флориан Вирц «Ливерпуль»га мос равишда 145 ва 125 миллион еврога, Энцо Фернандес — «Челси»га 121 миллионга, Жек Грилиш эса — «Манчестер Сити»га 117,5 миллионга ўтган. Бундан ташқари, «шаҳарликлар» тез орада Эллиот Андерсонни тахминан 135 миллионга сотиб олганини эълон қилади.
Айни пайтда «Тоттенхэм»нинг рекорд трансфери — ўтган ёзда «РБ Лейпциг»дан 65 миллионга ўтган ярим ҳимоячи Хави Симонс ҳисобланади.
Агар Сандро бўйича келишувни ҳисобга олсак, «шпорлар» бир сутка ичида майдон марказини кучайтириш учун 200 миллиондан ортиқ маблағ сарфлади — аввалроқ «Вест Хэм»нинг 21 ёшли хавбеки Матеуш Фернандешнинг Лондон клубига тахминан 99 миллионга ўтиши кутилаётгани маълум бўлган эди.
Шунингдек, «Тоттенхэм» «Брайтон» ҳимоячиси Ян Пол ван Хекке учун 60 миллион тўлади ва эркин агент сифатида дарвозабон Мартин Дубравка ҳамда ҳимоячилар Энди Робертсон ва Маркос Сенеси билан шартнома имзолади.
