Футболдаги сулолалар: оталардан фарзандларга ўтган буюк мерос
Футбол — нафақат истеъдод, меҳнат ва маҳорат, балки баъзан авлоддан-авлодга ўтиб келадиган оилавий анъана ҳамдир. Дунё футболи тарихида шундай оилалар борки, уларнинг бир неча вакиллари профессионал даражада тўп тепиб, клублар ва миллий жамоалар тарихида ўз номини қолдирган.
Айрим сулолаларда ота ўз даврининг юлдузи бўлган бўлса, фарзанди унинг изидан борган. Бошқаларида эса бир оиланинг уч авлоди ҳатто чемпионлик совринларини қўлга киритган. Қуйида машҳур ва қизиқарли сулолалар ҳақида сўз юритамиз.
Мальдинилар — «Милан» билан яшаган уч авлод
Футболдаги сулолалар ҳақида гап кетганда, биринчи бўлиб Мальдинилар ёдга олинади. Чезаре Мальдини «Милан»нинг буюк ҳимоячиларидан бири бўлган. У 1962/63 йилги Европа чемпионлар кубогида ғолиб чиққан. Унинг ўғли Паоло эса отасининг ютуқларидан ҳам ошиб кетди: «Милан» сафида 24 йиллик фаолияти давомида беш марта Европа/Чемпионлар лигаси кубогини қўлга киритди ва клуб тарихидаги энг буюк футболчилардан бирига айланди.
Аммо Мальдинилар тарихи шу билан тугамади. Паолонинг ўғли Даниэль ҳам «Милан» академиясидан чиқиб, асосий жамоа сафида майдонга тушди. 2021/22 йилги мавсумда у Италия чемпионлигини қўлга киритиб, бобоси ва отасининг изидан борди.
Шмейхеллар — дарвозадаги икки авлод
Футболдаги энг машҳур дарвозабонлар сулолаларидан бири — Петер ва Каспер Шмейхеллар.
Петер Шмейхел «Манчестер Юнайтед» тарихидаги энг буюк дарвозабонлардан бири ҳисобланади. У 1992 йил Дания билан Европа чемпионлигини қўлга киритган ва 1999 йил «Манчестер Юнайтед» билан требл қайд этган.
Ўғли Каспер эса «Лестер Сити» билан 2015/16 йилги мавсумда Премьер-лигада чемпион бўлди. Бу ғалаба футбол тарихидаги энг катта сенсациялардан бири сифатида қолди.
Шундай қилиб, Петер ва Каспер Англия чемпионлигида ғолиб чиққан машҳур ота-бола жуфтликларидан бирига айланди. FIFA ҳам Шмейхелларнинг бу ютуғини алоҳида қайд этган.
Тюрамлар — ҳимоячидан ҳужумчигача
Франция футболининг энг машҳур сулолаларидан бири — Тюрамлар.
Лилиан Тюрам 1998 йил Франция билан жаҳон чемпиони бўлган. У фаолиятининг асосий қисмини «Парма», «Ювентус» ва «Барселона» каби клубларда ўтказган.
Унинг ўғиллари Маркус ва Кефрен ҳам профессионал футболчи бўлишди.
Маркус Тюрам отасидан фарқли равишда ҳужумчи позициясида ўйнайди. У «Боруссия» Мёнхенгладбахдан кейин «Интер» таркибига ўтиб, Италия чемпионлигида ҳам ғолиб чиқди. Кефрен эса ярим ҳимоячи сифатида танилди ва «Ницца»даги ўйинлари орқали Европа футболининг эътиборини қозонди.
Эътиборлиси, Лилиан ҳимоячи бўлган бўлса, Маркус ҳужумчи сифатида катта натижаларга эришди. FIFA маълумотларига кўра, ота ва ўғиллар позицияси ва карьера йўли жиҳатидан анча фарқ қилади.
Зиданлар — футболдан мураббийликкача
Зинедин Зидан номи футбол тарихида алоҳида ўринга эга. Франция билан жаҳон чемпиони бўлган Зидан «Ювентус» ва «Реал»даги фаолияти билан бутун бир авлод футбол мухлисларининг қаҳрамонига айланган.
Кейинчалик у «Реал»ни бош мураббий сифатида ҳам тарихий ютуқларга олиб келди — жамоа унинг қўл остида Чемпионлар лигасида кетма-кет уч марта ғолиб чиқди.
Зиданнинг фарзандлари ҳам футболни танлади. Энцо, Лука, Тео ва Эльяз профессионал футбол билан шуғулланган.
Кройфлар — футбол фалсафаси мероси
Йохан Кройф нафақат футболчи, балки бутун бир футбол фалсафасининг асосчиси сифатида танилади. «Аякс», «Барселона» ва Нидерландия терма жамоасидаги фаолияти уни футбол тарихидаги энг буюк шахслардан бирига айлантирган.
Унинг ўғли Йорди Кройф ҳам профессионал футболчи бўлиб, «Барселона», «Манчестер Юнайтед» ва Нидерландия терма жамоасида ўйнаган.
Албатта, Йорди отасининг даражасига чиқмади. Аммо у ўз карьерасига эга бўлиб, Европанинг йирик клубларида тўп тепди.
Бу ҳолат футболдаги муҳим ҳақиқатни кўрсатади: машҳур фамилия футболчини буюк қилиб қўймайди.
Алкантаралар — Бразилия ва Испанияни боғлаган оила
Бразилиялик Мазиньо 1994 йил жаҳон чемпиони бўлган таркибда ўйнаган.
Унинг фарзандлари Тиаго Алкантара ва Рафинья ҳам профессионал футболчилар бўлишди.
Тиаго Испания терма жамоасини танлаб, «Барселона», «Бавария» ва «Ливерпуль» каби клубларда ўйнади. У «Бавария» билан Чемпионлар лигасида ғолиб чиқди.
Рафинья эса Бразилия терма жамоаси сафида майдонга тушди ва «Барселона»да ҳам тўп тепди. Шу тариқа, бир оила футбол орқали икки хил миллий футбол мактабини намоён қилди.
Клюйвертлар — ҳужумчилар сулоласи
Нидерландия футболининг машҳур сулолаларидан бири — Клюйвертлар.
Патрик Клюйверт «Аякс», «Милан» ва «Барселона» каби клубларда ўйнаган, Нидерландия терма жамоасининг энг машҳур ҳужумчиларидан бири бўлган.
Унинг ўғли Жастин ҳам «Аякс» академиясидан чиқиб, кейинчалик Европа клубларида фаолият юритди.
Жастин отасидек «Аякс»дан катта футболга қадам қўйди ва Нидерландия терма жамоасигача етиб борди.
Ҳагилар — Руминиянинг футбол мероси
Руминия футболининг афсоналаридан бири — Георге Ҳаги.
«Карпат Марадонаси» деб аталган Ҳаги «Реал», «Барселона» ва «Галатасарой» каби клубларда ўйнаган.
Унинг ўғли Яннис Ҳаги ҳам профессионал футболчи бўлди ва Румыния терма жамоаси сафида майдонга тушди.
Чисалар — Италиядаги яна бир футбол оиласи
Италия футболида Федерико Чиса отаси Энрико Чисанинг йўлини давом эттирган футболчилардан бири.
Энрико Чиса Италия терма жамоаси ва «Парма», «Фиорентина» каби клубларда ўйнаган.
Федерико эса «Фиорентина» ва «Ювентус»даги ўйинлари, шунингдек Италия терма жамоасидаги иштироки билан танилди. У 2021 йил Европа чемпионатида Италиянинг ғалабасига ҳисса қўшди.
Симеонелар — футболчи отасидан мураббийгача
Аргентина футболининг яна бир машҳур сулоласи — Симеонелар.
Диего Симеоне футболчи сифатида «Атлетико», «Интер» ва «Лацио» каби клубларда ўйнаган, Аргентина терма жамоаси сафида ҳам катта тажриба тўплаган.
Кейинчалик у «Атлетико» бош мураббийи сифатида клуб тарихидаги энг муваффақиятли мутахассислардан бирига айланди.
Унинг ўғли Жованни Симеоне эса ҳужумчи сифатида Италия чемпионатида ўзини кўрсатди ва Наполи билан А Серияда чемпион бўлди. Бу ота-бола турли ролларда бўлса ҳам, чемпионлик анъанасини давом эттирган сулолалардан биридир.
