O‘zbekistonlik tennischilar xalqaro musobaqalarda ishtirok etishni boshlamoqda
Barletta shahrida (Italiya) erkaklar o‘rtasida 91 ming yevro mukofot jamg‘armasiga ega «Challenger» turniri boshlandi. Unda o‘zbekistonlik tennischi Humoyun Sultonov ishtirok etadi. U jahon reytingida 229-o‘rinni egallab turibdi va birinchi bosqichda ukrainalik Oleksandr Ovcharenkoga (327) qarshi o‘ynaydi.
Mukofot jamg‘armasi 30 ming dollar bo‘lgan Antaliyadagi boshqa bir turnirda Sergey Fomin (555) germaniyalik Tom Genttsga (457) qarshi ilk o‘yinini o‘tkazadi. Shuningdek, Fomin hamkori Pavel Verbin bilan juftlik bahslarida ham ishtirok etadi.
Bundan tashqari, Antaliyada o‘tayotgan sovrin jamg‘armasi 15 ming dollar bo‘lgan ayollar o‘rtasidagi turnirda Sabrina Olimjonova (1371) birinchi bosqichda argentinalik Justina Mariya Gonsalesga (842) qarshi bellashadi.
