«Qirollik klubi» mavsumoldi o‘rtoqlik uchrashuvida Vengriyaning «Ferensvarosh» jamoasini 2:1 hisobida mag‘lub etdi. Bu uchrashuv yangi mavsum oldidan madridliklar uchun ikkinchi jiddiy sinov bo‘ldi.

Raqib Yevropa ligasi saralashi va milliy chempionatdagi dastlabki bahslardan so‘ng yuqori sport formasida maydonga tushgani bois, uchrashuv oddiy o‘rtoqlik o‘yinidan ancha murakkab kechdi. Ikkinchi bo‘limda ayrim qiyinchiliklarga duch kelgan bo‘lsa-da, «Real» g‘alabani saqlab qoldi.

Endilikda Mourino shogirdlarini mavsum boshlanishidan oldin yana ikkita sinov — «Deportivo» va «Shalke»ga qarshi bahslar kutmoqda.

«Marca» nashrining yozishicha, Rodrining transferi to‘xtab qolgach, asosiy e'tibor jamoa tarkibiga qaratildi. Biroq Mourino Vengriyaga yetib kelishi bilanoq o‘z rejasini ochiq aytdi.

«Bizga taxminan 20 nafar futbolchidan iborat kichik tarkib kerak,» — dedi portugaliyalik mutaxassis.

Bu bayonot murabbiyning kelajakdagi rejalari borasidagi barcha savollarga javob bo‘ldi. Ammo jamoani hanuz jarohatlar muammosi tark etgani yo‘q.

Mourinyo allaqachon bir qator yo‘qotishlarga duch kelgan. Himoyachi Din Xeysen jarohat olgan bo‘lsa, Raul Asensio va Tiago Pitarch ham safdan chiqqan. Shuningdek, Eder Militao, Ferlan Mendi va Rodrigo ham hozircha jamoaga yordam bera olmayapti.

Shunga qaramay, portugaliyalik murabbiy deyarli har bir pozitsiyada kamida ikkita, ayrim joylarda esa uchta variantga ega.

Darvoza chizig‘ida Andrey Lunin ishonchli zaxira hisoblanadi. Qanot himoyasida Mark Kukurelya, Alvaro Karreras, Denzel Dyumfris, Trent Aleksander-Arnold va kerak bo‘lsa Ferlan Mendi ham o‘ynashi mumkin.

Markaziy himoyada esa Ibraima Konatening transferidan keyin Raul Asensio beshinchi tanlovga aylanib qoldi. Shu sababli uning jamoani tark etishi ehtimoli tobora kuchaymoqda.

Tayanch yarim himoyasi uchun Orelen Chuameni, Federiko Valverde, Bernardu Silva, Eduardo Kamavinga va Tiago Pitarch kurash olib bormoqda.

Ikki o‘rin uchun besh nafar futbolchining raqobati Mourinodan rotatsiyani juda ehtiyotkorlik bilan boshqarishni talab qiladi.

Chap qanotda Vinisius Junior asosiy nomzod bo‘lib turibdi. Rodrigo sog‘aygach, o‘zining tabiiy pozitsiyasiga qaytishi kutilmoqda.

O‘ng qanotda Yan Diomande va Brahim Dias harakat qilmoqda. Zarurat tug‘ilganda Endrik hamda Federiko Valverde ham ushbu pozitsiyada o‘ynashi mumkin.

Hujum ortida Jud Bellingem va Arda Gyuler variantlari mavjud. Markaziy hujumda esa asosiy umid Kilian Mbappe bo‘lib qolmoqda. Uni Espi va Endrik zaxiradan qo‘llab-quvvatlashi mumkin.

Mourinoning kichik tarkib haqidagi qarori ayrim mashhur futbolchilarning muntazam ravishda zaxirada qolishiga olib kelishi mumkin.

Biroq «Real Madrid» so‘nggi yillarda jarohatlar sabab ko‘p bor favqulodda vaziyatlarga duch kelgan. Aynan shu omil ko‘pincha klubni qo‘shimcha transferlar qilishga yoki akademiya tarbiyalanuvchilariga imkoniyat berishga majbur qilgan.

Shu bois Mourinyoning ixcham tarkib bilan ishlash rejasi muvaffaqiyat keltiradimi yoki aksincha, jamoa uchun muammoga aylanadimi, bunga faqat mavsum davomida javob topiladi. Sizchi, siz nima deb o'ylaysiz? Fikrlaringizni izohlarda qoldiring.

Yan Diomande — «RB Leypsig»dan “Real Madrid”ga, 140 million yevro

Ushbu transfer «RB Leypsig» uchun nimani anglatadi?

Bir yil avval 20 million yevroga sotib olingan futbolchidan 120 million yevro foyda qilish «RB Leypsig» uchun ajoyib biznes bo‘ldi. Avvalroq Benjamin Sheshko, Yoshko Gvardiol, Dominik Soboslai va Dani Olmo kabi futbolchilar ham «Red Bull Arena»da o‘sib, keyinchalik katta klublarga yo‘l olgan edi. Diomande esa bu ro‘yxatdagi eng katta muvaffaqiyatlardan biriga aylanishi mumkin.

Shu bilan birga, «Leypsig» uchun uni almashtirish juda qiyin bo‘ladi. Diomande o‘tgan mavsumda klubning Bundesligada uchinchi o‘rinni egallashida asosiy kuchlardan biri bo‘ldi. U yarim himoyachi Kristof Baumgartner bilan deyarli ideal darajada o‘zaro tushunish hosil qilgandi. Uning tezkor driblingi, aniq zarbalari va oldinga yo‘naltirilgan paslarisiz «Leypsig» Chempionlar ligasi zonasiga qaytishda qiynalishi mumkin.

Shunga qaramay, nemis klubi o‘z yetakchilarini qimmat narxda sotishga o‘rganib qolgan. Klubning transfer modeli ham aynan shunga asoslangan. «Leypsig» tez orada yana yangi iste’dod topishi mumkin. Agar Diomande «Real»da darhol o‘zini ko‘rsata olsa, bu nemis klubining iqtidorlarni topish borasidagi obro‘sini yanada oshiradi.

Diomande «Real Madrid» uchun qanchalik foydali?

«Real» Diomande uchun ortiqcha pul to‘lagandek ko‘rinadi. Ammo bugungi transfer bozorida asosiy maqsadni qo‘lga kiritish uchun ko‘pincha shunday yo‘l tutishga to‘g‘ri keladi.

Madrid klubiga qanotlarda qo‘shimcha variant juda zarur edi. Rodrigo tizza old xochsimon boylami jarrohligidan tiklanishda davom etmoqda va 2027-yilgacha safga qaytmasligi kutilmoqda. Diomande esa har ikki qanotda ham o‘ynay oladi.

Ba’zi taxminlarga ko‘ra, «Real» Diomandeni Vinisius Juniorning o‘rnini egallash uchun olgan bo‘lishi mumkin, chunki braziliyalik futbolchiga «Arsenal» jiddiy qiziqmoqda. Biroq Diomande o‘tgan mavsum «Leypsig» safidagi 36 ta o‘yinining aksariyatida o‘ng qanotda harakat qilgan.

U hujumga faol qo‘shiladigan Trent Aleksander-Arnold uchun ideal sherik bo‘lishi mumkin. Diomande Joze Mourinoning 4-2-3-1 tizimiga ham juda mos tushadi. Unda himoyani yorib kirish uchun tezlik va chaqqonlik, to‘pni qaytarib olish uchun esa kuch va pressing bor.

Diomande hali tajribasiz futbolchi, ammo tez o‘rganish qobiliyatiga ega. Uning La Liga muhitini bilishi ham moslashuv jarayonini yengillashtiradi. PSJ va «Liverpul» kabi klublarni ortda qoldirib, Diomandeni qo‘lga kiritish «Real» ikki mavsum sovrinsiz qolganiga qaramay, hamon dunyodagi eng katta klub ekanini ko‘rsatadi.

19 yoshli iqtidor bu yutuqqa qanday erishdi va uni oldinda nimalar kutmoqda?

Bu Diomande uchun orzudagi transfer bo‘ldi. Bir yil avval ko‘pchilik muxlislar uni deyarli tanimasdi. U La Ligadan tushib ketgan «Leganes»dan «Leypsig»ga 20 million yevro evaziga o‘tgan edi.

Diomande «Leganes»dagi yagona mavsumida atigi 10 ta liga o‘yinida maydonga tushgan, avval esa zaxira jamoada o‘ynagan. Ammo «Leypsig» uning ulkan salohiyatiga ishondi va bu qaror tezda o‘zini oqladi.

U professional faoliyatidagi ilk to‘liq mavsumidayoq barcha musobaqalarda 23 ta samarali harakat qayd etdi. Keyin Jahon chempionatiga chaqirildi va Kot-d’Ivuar terma jamoasi bilan 1/16 finalgacha yetib bordi.

19 yoshli futbolchi qisqa vaqt ichida Yevropaning bir qator grand klublari e’tiboriga tushdi. Biroq «Real Madrid»dan taklif kelishini uning o‘zi ham kutmagan bo‘lsa kerak. Endi u «Santyago Bernabeu»dagi bosim va 140 million yevrolik narx bilan kurashishi kerak bo‘ladi. Ammo qanday bo‘lmasin, uning bu darajaga yetib kelganini o'zi allaqachon katta yutuq bo'lib ulgurdi.

«Tottenhem» yozgi transfer oynasidagi eng yirik kelishuvlardan birini amalga oshirishni rejalashtirmoqda. London klubi «Galatasaroy» hujumchisi Viktor Osimhenni asosiy transfer maqsadi sifatida belgilagan.

Italiyalik bosh murabbiy Roberto De Zerbi yangi mavsum oldidan tarkibni kuchaytirishda davom etmoqda va hujum chizig‘iga yuqori saviyali markaziy hujumchi olib kelishni istaydi.

Xabarlarga ko‘ra, «Tottenhem» nigeriyalik forvard uchun jiddiy taklif tayyorlamoqda. Dastlabki taklif miqdori 50–55 million funt atrofida bo‘lishi mumkin.

Biroq «Galatasaroy» o‘zining eng yaxshi to‘purari bilan xayrlashish uchun taxminan 65 million funt talab qilmoqda. Ayrimlar bu summani yuqori deb hisoblamoqda, ammo futbolchining jamoa uchun ahamiyati va amaldagi shartnomasi turk klubining pozitsiyasini kuchaytiradi.

De Zerbi hujumda o‘yinni hal qila oladigan sof markaziy forvardga muhtoj. Ayniqsa, Risharlisonning kelajagi noaniq bo‘lib turgani, Dominik Solanke esa jamoaning hujumdagi muammolarini to‘liq hal qila olmagani fonida bu ehtiyoj yanada oshgan.

Italiyalik mutaxassis nazarida Osimhen aynan kerakli profilga ega futbolchi. U jismoniy kuchi, tezligi, jarima maydonidagi aqlli harakatlari va to‘pni nazoratga asoslangan uslubga mosligi bilan De Zerbi talablariga javob beradi.

CaughtOffside nashri futbolchi agentlariga yaqin manbalarga tayanib xabar berishicha, «Tottenhem» sport tomondan ushbu transfer bo‘yicha rasmiy muzokaralarni boshlash uchun «yashil chiroq» olgan.

Manbaga ko‘ra, futbolchining shaxsiy shartlari kelishuvni yakunlashda katta to‘siq bo‘lmasligi kutilmoqda. Osimhen Premyer-ligada o‘zini sinab ko‘rishga tayyor.

Ajoyib statistika uning narxini oshirmoqda

Viktor Osimhen o‘tgan mavsumni «Galatasaroy» safida juda yuqori saviyada o‘tkazdi. U barcha musobaqalarda 52 ta o‘yinda 41 ta gol va 10 ta assist qayd etdi.

Aynan shu ko‘rsatkichlar unga Yevropaning yirik klublari tomonidan katta qiziqish bo‘layotganini tushuntirib beradi. De Zerbi Osimhenning gol urish sezgisi va jarima maydonidagi kuchli ishtiroki «Tottenhem» hujumini butunlay o‘zgartirishi mumkin, deb hisoblamoqda.

Nigeriya terma jamoasi bosh murabbiyi Erik Shell ham hujumchini yuqori baholagan. U Osimhenni so‘nggi mavsumlardagi o‘yinlari uchun «dunyoning eng yaxshi hujumchisi» deb atagan.

Hozircha «Tottenhem» va «Galatasaroy» o‘rtasida rasmiy aloqa yoki to‘g‘ridan-to‘g‘ri muzokaralar boshlanmagan. Ammo London klubining qiziqishi tobora kuchayib bormoqda.

Shu bilan birga, «Tottenhem» rahbariyati bunday yirik transferni amalga oshirish oson bo‘lmasligini yaxshi tushunadi. Klub joriy transfer oynasida allaqachon katta mablag‘ sarflagan. Shu sababli Osimhen transferi uchun avval bir nechta futbolchini sotishga to‘g‘ri kelishi mumkin.

Ideal transfer, ammo shartlar bor

Bu borada ko‘p narsa Risharlisonga bog‘liq bo‘lishi mumkin. Braziliyalik hujumchi hali jamoada qolish yoki ketish borasida yakuniy qarorga kelmagan.

The Guardian xabariga ko‘ra, De Zerbi Risharlisonning jamoada qolishini istaydi. Biroq murabbiy futbolchining yakuniy qarori hali aniq emasligini ham biladi.

Risharlisonning shartnomasi yakuniga bir yildan kam vaqt qolgan. Agar u jamoani tark etsa, «Tottenhem» transfer uchun qo‘shimcha mablag‘ga ega bo‘ladi va yuqori saviyali o‘rinbosar olib kelish zarurati yanada kuchayadi.

Ammo Osimhen transferi oson kechmaydi. Hujumchiga Yevropaning bir qator yirik klublari ham qiziqmoqda. Ayniqsa, «Manchester Yunayted», «Chelsi» va «Atletiko Madrid» uning holatini kuzatib bormoqda. Bu raqobat futbolchining narxini oshirishi va «Tottenhem»ning muzokaradagi imkoniyatlarini kamaytirishi mumkin.

Osimhen bugungi kunda Yevropadagi eng to‘liq hujumchilardan biri hisoblanadi. Tezlik, jismoniy kuch, pressingda faol ishtirok etish va golni aniq yakunlash qobiliyati uni «Tottenhem» uchun ideal taktik variantga aylantiradi.

Biroq yakuniy qarorda pul masalasi hal qiluvchi bo‘ladi. Agar London klubi uni taxminan 60 million funt atrofida qo‘lga kirita olsa, bu mantiqli transfer bo‘lishi mumkin. Ammo narx 100 million funt chegarasidan oshib ketsa, bu «Tottenhem» uchun katta xavfga aylanishi ehtimoli bor.

Fransiyalik tajribali mutaxassis Arsen Venger FIFA prezidenti Janni Infantino atrofidagi mojarolar fonida savollar ostida qolmoqda.

Britaniyaning The Telegraph nashri yozishicha, sobiq “Arsenal” bosh murabbiyining Jahon chempionati bilan bog‘liq muvaffaqiyatsiz savdo loyihasi yuzasidan sukut saqlayotgani ko‘pchilikda savol uyg‘otmoqda. Chunki Venger avvallari futbolga pulning haddan tashqari ta’sirini keskin tanqid qilib kelgan.

Manbaga ko‘ra, FIFA rahbariga yaqin bo‘lgan bir qator maslahatchilar, yuqori lavozimli mutasaddilar, hatto AQSH prezidenti Donald Tramp ham mojaroga aralashib qolgan shveysariyalik amaldordan turli darajada masofa saqlashga urinmoqda. Biroq Vengerning bu boradagi pozitsiyasi hozircha noma’lumligicha qolmoqda.

76 yoshli Venger og‘ir Jahon chempionati taqvimidan keyin o‘z rahbariga qarshi ochiq bayonot berishga majbur emas. Ammo aynan bu yo‘nalish uning mutaxassislik sohasi hisoblanadi. Shu sababli kuzatuvchilar uning bu masalaga qanday aloqasi borligi yoki jarayonlardan qanchalik xabardor bo‘lgani haqida savollar berishi tabiiy.

Albatta, sukut saqlash aybdorlikni anglatmaydi. Biroq Vengerning Infantino yonida bo‘lishi FIFA prezidentiga ma’lum darajada obro‘ va ishonch bag‘ishlaydi. Bu holat 2019-yil noyabr oyidan beri davom etib kelmoqda. O‘shanda FIFA Vengerning tashkilotdagi lavozimga tayinlanganini Infantino bilan qo‘l berib ko‘rishayotgan surati orqali e’lon qilgandi.

Infantino FIFA rahbarligidagi 10 yilligini nishonlaganida, Venger uni “doimo oldinga intilishga va yangi g‘oyalar yaratishga tayyor inson” deb ta’riflagan. Jahon chempionati davomida ham kameralar Vengerni ko‘p bor Infantino ortida o‘tirgan yoki tribunada u bilan qo‘l berib ko‘rishayotgan holda tasvirga olgan.

Bahsli aloqalar

“Arsenal”dagi faoliyati davomida Vengerni futbolning axloqiy ramzi va o‘yinning sodiq himoyachisi sifatida ko‘rgan muxlislar uchun uning so‘nggi yillarda FIFA bilan yaqin aloqalari og‘ir qabul qilinmoqda.

The Telegraph ta’kidlashicha, Infantino boshqaruvi atrofidagi bahslar yanada kuchaygan bir paytda bu aloqalar Venger uchun yanada noqulay ko‘rinish olmoqda.

Bir vaqtlar futbolni pul ta’siridan himoya qiluvchi shaxs sifatida ko‘rilgan Venger endilikda sport hisobidan moliyaviy foyda orttirishga urinayotgan guruhlar bilan bog‘lanib qolgan shaxs sifatida tasvirlanmoqda.

Endi asosiy savol shuki: Venger Infantino tomonida qolishda davom etadimi yoki bu safar chegara oshib ketganini ochiq bildiradimi?

Manbaga ko‘ra, uning allaqachon ushbu munosabatlar sabab dog‘ tushgan obro‘si endi aynan qaysi yo‘lni tanlashiga bog‘liq bo‘lishi mumkin.

«Manchester Siti» yarim himoyachi Rodri transferi borasida «Real» bilan muzokaralarda o‘z pozitsiyasidan chekinmoqchi emas. Ingliz klubi futbolchini sotishga majbur emas va kelishuv faqat o‘z talablariga mos taklif bo‘lsagina amalga oshishini bildirgan.

Kataloniyaning Sport nashri xabariga ko‘ra, «Real» Rodri transferi Diomande kelishuvi kabi oson kechadi, deb hisoblagan. Biroq har ikki yo‘nalishda ham Madrid klubi jiddiy qiyinchiliklarga duch kelmoqda.

Manbaga ko‘ra, «Manchester Siti» muzokara strategiyasini juda aniq olib bormoqda. Klub futbolchi uchun belgilangan narxni pasaytirmoqchi emas.

Ingliz klubi Rodrini sotishga majbur emas. Hatto futbolchi 2027-yilda erkin agent sifatida ketishi mumkin bo‘lsa ham, «Siti» uni hozir arzon narxda qo‘yib yuborishni istamayapti. Klub yarimhimoyachi uchun bonuslar bilan birga 70 million yevro talab qilmoqda va bu summadan chekinish niyatida emas.

«Siti» avval ham shunday yo‘l tutgan

Sport nashri yozishicha, «Manchester Siti»ning futbolchilarni sotishdagi siyosati doim aniq bo‘lgan: klub ketishni istagan futbolchiga to‘sqinlik qilmaydi, ammo faqat moliyaviy taklif jamoani qoniqtirgan taqdirdagina transferga rozilik beradi.

«Barselona» avvalroq Erik Garsiya transferida aynan shunday vaziyatga duch kelgan edi. Kataloniya klubi futbolchini darhol sotib ola olmagan va oxir-oqibat uning erkin agent sifatida ketishini kutishga majbur bo‘lgan. Shuningdek, «Barselona»ning Bernardu Silvani qo‘lga kiritish bo‘yicha bir nechta urinishlari ham rad etilgan.

Rodri ketishni so‘ragan

Manbaga ko‘ra, Rodri «Manchester Siti»dan ketish istagini allaqachon bildirgan. Endi u «Real» ingliz klubining moliyaviy talablarini bajarishini kutmoqda. «Siti» esa «Oltin to‘p» sohibi uchun so‘ralayotgan summani adolatli deb hisoblamoqda.

Madrid klubi rahbariyati dastlab transfer 48 soat ichida hal bo‘ladi, deb o‘ylagan. Ammo hozir «Real» muzokaralar ko‘proq vaqt olishini va kelishuv kutilganidek oson yakunlanmasligini tushunib turibdi.

«Manchester Siti» Buaddi transferi ustida ishlamoqda

Shu bilan bir vaqtda «Manchester Siti» Marokash terma jamoasi yarim himoyachisi Ayyub Buaddi transferi bo‘yicha ham harakat qilmoqda. «Lill» futbolchisi 2026-yilgi Jahon chempionatining kashfiyotlaridan biri sifatida ko‘rilmoqda.

Hozircha yakuniy kelishuv yo‘q, biroq futbolchi yaqin haftalarda «Manchester Siti» bilan shartnoma imzolashi mumkin. Uning kelishi Rodrining ketishini anglatmaydi. Bu transfer ko‘proq Mateo Kovachichning jamoani tark etishi bilan bog‘liq bo‘lishi mumkin, chunki u bosh murabbiy Enso Mareska rejalaridan o‘rin olmagan.

Sport nashri ta’kidlashicha, Rodri «Real» bilan to‘liq kelishuvga erishgan va transferni amalga oshirish uchun qo‘lidan kelgan barcha ishni qilmoqchi. Biroq uning «Manchester Siti» bilan alohida munosabatlari sabab futbolchi muzokaralarda ehtiyotkorlik bilan harakat qilmoqda.

Rodri o‘zining transfer qiymati bundan pastroq bo‘ladi, deb o‘ylagan. Endi esa «Real»ning shoshilinch ehtiyoji va «Manchester Siti»ning qat’iy talablari deyarli tayyor ko‘ringan kelishuvni murakkablashtirib yuborishi mumkin.

27 yoshli futbolchi Butan Premyer-ligasi ishtirokchisi «Thimphu City» klubi bilan rasmiy shartnoma imzoladi. U jamoaga Nepalning «Machindra» klubidan kelib qo‘shildi.

Alijonov shu yil boshida Nepalning «Machindra» klubi safida to‘p surgan edi. Undan avval esa Qirg‘izistonning «Neftchi» klubida ham faoliyat olib borgan. Futbolchining faoliyati davomida «Navbahor», «Paxtakor» yoshlar jamoasi hamda Tojikistonning «Ko‘ktosh» klublarida ham o‘ynagani ma’lum.

Shu tariqa Alijon Alijonov faoliyatida yana bir yangi chaqiriqni qabul qildi va endi Butan chempionatida «Thimphu City» sharafini himoya qiladi.

26 yoshli futbolchi mavsum arafasida jamoa bilan shartnoma imzolagandi. Biroq birinchi davrani o‘rtalariga kelib, tomonlar kelishuvni bekor qildi.

"Paxtakor" yetakchisi Hojiakbar Alijonovning ukasi bo‘lmish Javohir endilikda O‘zbekistonda to‘p suradi.

Futbolchi faoliyati davomida "Bunyodkor", "Andijon" va Farg‘onaning "Neftchi" klublari sharafini himoya qilgan. Shuningdek, u O‘zbekiston U-23 terma jamoasi safida ham o‘ynagan. Uning yangi jamoasi tez orada ma’lum qilinadi.

Transfermarkt talqiniga ko‘ra, hozirgi kunda bozoridagi eng qimmat 8 nafar erkin agent bilan tanishing.

1. Dushan Vlahovich — 35 million yevro

Reytingning birinchi pog‘onasini serbiyalik hujumchi Dushan Vlahovich egallab turibdi. Uning “Yuventus” bilan shartnomasi yakunlangach, erkin agent maqomiga ega bo‘ldi.

Vlahovich 2022 yil qishida “Fiorentina”dan 85 million yevroga Turinga ko‘chib o‘tgan va Italiya futboli tarixidagi eng qimmat transferlardan biri sifatida qayd etilgan edi. Biroq uning “bianconeri”dagi faoliyati kutilgan darajada bo‘lmadi.

O‘tgan mavsum son qismidagi jarohati sababli to‘rt oy maydonga tusha olmadi, biroq 23 o‘yinda 10 ta gol va 2 ta golli pas muallifi bo‘ldi.

2. Muhammad Salah — 22 million yevro

Misrlik yulduz Muhammad Salahning “Liverpul”dagi afsonaviy davri nihoyasiga yetdi. U “Enfild”ni klub tarixidagi eng buyuk futbolchilardan biri sifatida tark etdi.

34 yoshli hujumchi “qizillar” safida 250 dan ortiq gol urdi. Garchi uning so‘nggi yillardagi statistikasi ilgari kabi yuqori bo‘lmasa-da, Jahon chempionati–2026da milliy jamoada hali ham yuqori saviyada harakat qila olishini namoyon etdi.

Salahga Yaqin Sharq klublaridan katta maoshli takliflar bor, ammo u Yevropani tark etishga shoshilmayapti. Ayni paytda eng jiddiy muzokaralar Turkiyaning “Beshiktosh” klubi bilan kechmoqda.

3. Jeydon Sancho — 18 million yevro

Jeydon Sancho so‘nggi yillarda amalga oshmagan katta umidlar ramziga aylandi. U “Borussiya” Dortmundda porlaganidan so‘ng, 2021 yili “Manchester Yunayted” uni 85 million yevroga xarid qilgan edi. Ammo keyinchalik ingliz vingerining faoliyati pasayish yo‘liga kirdi.Shunga qaramay, Sancho 26 yoshida uchta Yevropa klub turniri finalida ishtirok etdi, bozor qiymati esa bir vaqtlar 130 million yevroga yetgan.

Yoz davomida unga Dortmund klubi qiziqish bildirdi, ammo shaxsiy shartlar bo‘yicha kelishuvga erishilmadi. Qatarning “Al-Rayyan” klubi ham futbolchiga taklif bilan chiqqan. Oxirgi ma’lumotlarga ko‘ra, Sanchoga Angliyaning “Brentford” klubi ham qiziqish bildirmoqda.

4. Bamba Dyeng — 15 million yevro

Senegallik hujumchi o‘tgan mavsum “Loryan” safida 15 ta gol urdi va Jahon chempionati–2026da ishtirok etdi.

26 yoshli futbolchi asosan Fransiya Ligasi 1da o‘ynagan bo‘lsa-da, turli vaqtlarda Angliya va Ispaniya klublari ham unga qiziqish bildirgan.

Iyul oyida Rossiyaning “Zenit” va “Krasnodar” klublari tomonidan qiziqish bo‘lgani haqida xabarlar tarqaldi. Biroq futbolchining so‘nggi to‘rt yil ichida sakkiz marta jarohat olgani va jami 271 kunni maydondan tashqarida o‘tkazgani ehtimoliy xaridorlarni ikkilantrmoqda.

5. Yulian Brandt — 15 million yevro

30 yoshli nemis yarim himoyachisi Bundesligada 13 mavsum o‘tkazdi. Uning so‘nggi yetti yili Dortmundning “Borussiya” klubida kechdi.

Klub uni 2019 yili 25 million yevroga xarid qilgan edi. Brandt muntazam Germaniya terma jamoasiga chaqirilgan, garchi so‘nggi ikki yirik turnirni o‘tkazib yuborgan bo‘lsa ham.

O‘tgan mavsum u barcha musobaqalarda 41 ta uchrashuvda maydonga tushib, 11 ta gol va 4 ta assist qayd etdi.

6. Frank Kessye — 12 million yevro

Kot-d’Ivuarlik yarim himoyachi Frank Kessye “Al-Ahli” bilan xayrlashdi. U Saudiya klubi safida ketma-ket ikki marta Osiyo Chempionlar ligasida g‘olib chiqdi. Undan avval “Milan”dagi muvaffaqiyatli o‘yinlari orqali “Barselona”ga o‘tgan, keyin esa Saudiya tomon yo‘l olgan edi. Endi esa uning Yevropaga qaytishi ehtimoli yuqori baholanmoqda. Eng katta qiziqishni “Yuventus” bildirayotgan bo‘lsa, “Beshiktosh” ham uni kuzatmoqda.

7. Fabinyo — 12 million yevro

32 yoshli braziliyalik yarim himoyachi ham Saudiya Arabistonining “Al-Ittihod” klubini tark etdi. U “Liverpul”dan ketgach, uch mavsum ushbu jamoada to‘p surdi. So‘nggi Osiyo Chempionlar ligasida Fabinyo chorak finalga chiqish uchun hal qiluvchi gol urgan bo‘lsa, keyingi bosqichda omadsiz rikoşet sabab jamoasi musobaqani tark etdi.

Fabinyo Jahon chempionati–2026da Braziliya terma jamoasi tarkibiga chaqirilgan bo‘lsa-da, ko‘p o‘yin amaliyotiga ega bo‘lmadi. Yevropaga qaytishi mumkin, ammo eng ehtimoliy variant — Braziliya chempionati.

8. Leon Goretzka — 12 million yevro

Germaniyalik tajribali yarim himoyachi Leon Goretzkaning “Bavariya”dan ketishi o‘tgan mavsumning o‘zida ma’lum bo‘lgan edi.

So‘nggi yillarda u asosiy tarkibdagi o‘rnini yosh Aleksandr Pavlovichga boy berdi. Shunga qaramay, Germaniya terma jamoasi bosh murabbiyi Yulian Nagelsmann uni Jahon chempionati–2026 uchun tarkibga kiritdi.

Hozirda Goretzkaga “Yuventus” va “Barselona” qiziqish bildirmoqda. Ayniqsa, Xansi Flik boshqaruvida 2020 yili “Bavariya” bilan oltita sovrin yutgan Goretzkaning tajribasi hali ham Yevropa grandlari uchun katta ahamiyatga ega.

Bu ro‘yxatda qolgan ikki nafar erkin agent ham yaqin kunlarda o‘zlariga yangi klub topishi kutilmoqda. Transfer oynasi yopilishiga oz vaqt qolgani sabab, avgust oyi bozordagi eng qiziqarli voqealarga boy bo‘lishi mumkin.

Jamoada maoshlar va boshqa moliyaviy majburiyatlar bilan bog‘liq muammolar yuzaga kelgani haqida xabarlar tarqalgan.

"Kattaqo‘rg‘on"ga qarshi bahsdan so‘ng jamoa bosh murabbiyi Eldor Boymatov ham ushbu xabarlarni tasdiqladi. Uning aytishicha, klub safardagi bellashuvlar uchun pul topmoqda. Ammo boshqa xarajatlar uchun klubda pul yo‘qligi ma'lum bo‘ldi. Qolaversa, maoshlar berilmasligi sababli bir qator o‘yinchilar tark etishgan.

Moliyaviy muammolar sabab jamoa davralar oralig‘ida yig‘in ham tashkil eta olmagan.

Sports24.uz xabar berishicha, klub futbolchi bilan rasmiy shartnoma imzolagan. Endi Oqbutayev yangi jamoasi sharafini himoya qiladi.

Vohidjon mavsumning dastlabki qismini O‘zbekiston birinchi ligasi ishtirokchisi “Sherdor” klubida o‘tkazgan.

Ilgari u “Dinamo” hamda “Mash’al” jamoalari sharafini ham himoya qilgandi.

Sports24.uz xabar berishicha, futbolchi “Ilbirs” klubi bilan mavsum yakuniga qadar bitim imzoladi. Tursunov birinchi davrani hech bir jamoada o‘tkazmagandi.

Ilgari u “Abdish-Ata”, “Neftchi” va “Alay” kabi Qirg‘izistonning top jamoalari sharafini himoya qilgan. Keyinchalik “Dinamo”da ham o‘ynagan.

Eslatib o‘tamiz, Qirg‘iziston Oliy ligasida 14 ta jamoa ishtirok etmoqda.