Volkanovski Jastin Getjiga qarshi superjang o‘tkazmoqchi
UFCning yarim yengil vazn toifasidagi chempioni Aleksandr Volkanovski yengil vazn chempioni Jastin Getjiga qarshi jang o‘tkazish istagini bildirdi. Avstraliyalik sportchi mazkur to‘qnashuv faoliyatidagi eng yirik janglardan biri bo‘lishi mumkinligini ta’kidlab, Getjining chempionlik kamari uchun kurashishga tayyorligini ma’lum qildi. Bu haqda MMA Fighting nashri xabar bermoqda.
Manbaga ko‘ra, Volkanovski ‘‘Who The Fook Are These Guys?’’ podkastida Getji bilan ehtimoliy jang haqida gapirgan. Uning fikricha, har ikki sportchi faoliyatining yakuniy bosqichiga yaqinlashmoqda va ular o‘rtasidagi to‘qnashuv muxlislar uchun katta voqea bo‘lishi mumkin. ‘‘Tasavvur qiling, Getji va men yengil vazn chempionlik kamari uchun jang qilamiz. Bu ikkalamiz uchun ham faoliyatimizni yakunlash oldidan ajoyib superjang bo‘lardi. Shundan keyin ikkala vazn toifasida ham yangi davr boshlanishi mumkin’’, degan Volkanovski.
Shu bilan birga, 38 yoshli avstraliyalik jangchi hozircha bor e’tiborini Movsar Yevloyevga qarshi bo‘lajak titul himoyasiga qaratgan. Volkanovski 24-oktabr kuni Abu-Dabida o‘tkaziladigan UFC 333 turnirida mag‘lubiyatsiz rossiyalik sportchiga qarshi oktagonga chiqadi. Chempion Yevloyevning kurashdagi ustunligini zararsizlantirib, jangni tik turgan holatda olib borishga va raqibini muddatidan oldin mag‘lub etishga ishonmoqda. Getji bilan ehtimoliy superjang esa 2027-yilda tashkil etilishi mumkin.
Ma’lumot uchun, Volkanovski avvalroq ikki marta yengil vazn chempionlik kamarini qo‘lga kiritishga uringan, biroq har ikkala jangda ham Islom Maxachevga mag‘lub bo‘lgan. Jastin Getji esa 2026-yil iyun oyida Iliya Topuriyani mag‘lub etib, UFCning yengil vazn toifasidagi chempioniga aylangan. Ayni paytda ushbu vaznda Arman Sarukyan va Charlz Oliveyra kabi da’vogarlar ham chempionlik jangi uchun kurashmoqda. Hozircha UFC Volkanovski va Getji o‘rtasidagi ehtimoliy to‘qnashuv yuzasidan rasmiy qaror e’lon qilmagan.
