Voleybol. Nukusda U-17 qizlar o‘rtasidagi O‘zbekiston chempionati yakuniga yetdi
Qoraqalpog‘iston Respublikasining Nukus shahrida voleybol bo‘yicha U-17 yosh toifasidagi qizlar o‘rtasida O‘zbekiston chempionati bo‘lib o‘tdi. Mamlakatimizning turli hududlaridan tashrif buyurgan jamoalar ishtirokida o‘tgan mazkur musobaqa bir necha kun davomida yuqori saviyada tashkil etilib, yosh voleybolchilarning mahorati va jamoaviy o‘yinini namoyon etish uchun muhim sport maydoniga aylandi.
Chempionat davomida jamoalar o‘rtasida keskin va murosasiz bellashuvlar kechdi. Har bir uchrashuvda sportchilarning texnik tayyorgarligi, tezkorligi hamda g‘alabaga bo‘lgan kuchli intilishi yaqqol namoyon bo‘ldi. Ayniqsa, final bosqichidagi bahslar tomoshabinlar uchun qiziqarli va shiddatli o‘yinlarga boy bo‘ldi.
Musobaqaning yakuniy natijalariga ko‘ra peshqadamlar quyidagicha:
1-o'rin. Qoraqalpog‘iston Respublikasi jamoasi
2-o'rin. Surxondaryo viloyati jamoasi
3-o'rin. Namangan viloyati jamoasi.
Musobaqa yakunida chempion va sovrindor jamoalar medallar hamda esdalik sovg‘alari bilan taqdirlandi. Taqdirlash marosimida O‘zbekiston Milliy Olimpiya qo‘mitasining Qoraqalpog‘iston Respublikasi bo‘limi ijrochi direktori Sh. Aytbaev, Qoraqalpog‘iston Respublikasi Sport vaziri E. Qutibaev, Qoraqalpog‘iston Respublikasi Ichki ishlar vaziri o‘rinbosari G. Eshimbetov hamda bir qator mutasaddi tashkilotlar vakillari ishtirok etdilar. Ular musobaqa g‘oliblarini samimiy tabriklab, yosh sportchilarga kelgusidagi musobaqalarda ham muvaffaqiyatlar tiladilar.
