UFF Prezidenti milliy terma jamoa bilan uchrashdi
Avval xabar berganimizdek, futzal bo‘yicha O‘zbekiston milliy terma jamoasi joriy yilning 20–24-sentabr kunlari Bishkek shahrida bo‘lib o‘tadigan Osiyo Kubogi–2026 saralash musobaqasida ishtirok etadi.
Safar oldidan, bugun O‘zbekiston futzal federatsiyasi Prezidenti Bekzod Mamatqulov mamlakatimiz milliy terma jamoasi a’zolari bilan uchrashuv o‘tkazdi.
Muloqot davomida UFF rahbari jamoa a’zolariga samimiy tilaklarini bildirib, xalqimiz milliy terma jamoadan doimo hujumkor va g‘alabali o‘yinlarni kutishini ta’kidladi. Shuningdek, futbolchilarga Vatan sharafini munosib himoya qilishlarini tiladi.
“Sizlarning har bir harakatingiz, har bir g‘olingiz ortida millionlab insonlarning umidi va orzusi bor. Biz sizlarga ishonamiz. Sizlar nafaqat g‘alaba uchun, balki millat iftixori uchun kurashasizlar,” — deya ta’kidladi Bekzod Mamatqulov.
O‘zbekiston milliy terma jamoasi bosh murabbiyi Nodiр Eliboev jamoa Osiyo Kubogi saralash uchrashuvlariga puxta tayyorgarlik ko‘rganini ma’lum qildi. Uning so‘zlariga ko‘ra, futzalchilarning ham jismoniy, ham ruhiy holati yuqori darajada bo‘lib, jamoa birdamlik va intizom asosida harakat qiladi.
Shuningdek, so‘zga chiqqan terma jamoa sardori Mashrab Adilov va UFF Tibbiyot Departamenti bosh shifokori Lazizbek Teshabekovlar futbolchilarning barchasi sog‘-salomat ekanini, saralash bahslariga har tomonlama tayyor turganliklarini ma’lum qilishdi. UFF rahbariyatiga va futzal jamoatchiligiga bildirilayotgan ishonch uchun minnatdorchilik izhor etishdi.
“Turnir davomida yigitlar bor kuch va g‘ayratlarini safarbar etib, muxlislarimizni quvontiradigan natijalar bilan yurtimizga yorug‘ yuz ila qaytish niyatida safarga yo‘l olayapti,” — dedi Mashrab Adilov.
Yig‘ilish yakunida O‘zbekiston futbol faxriylari Kengashi raisi To‘lagan Isoqov so‘z olib, har bir futbolchining ortida Vatan sha’ni turganligini ta’kidladi. O‘zbekiston terma jamoasi murabbiylar shtabi hamda o‘yinchilariga saralash bahslarida omad yor bo‘lishini tilab, oq fotiha berdi.
