O‘zbekistonlik triatlonchilar IRONMAN Tallinn musobaqasini zabt etdilar
Mavsumning eng murakkab startlaridan biri Tallin shahrida nihoyatda og‘ir ob-havo sharoitida bo‘lib o‘tdi. Suzish bosqichida sovuq suv va quyuq tuman, velosiped bosqichida kuchli jala va bo‘ronli shamol, so‘ngra esa kechki va tungi yugurish vaqtida sovuq, yomg‘ir va kuchli shamol sportchilar uchun jiddiy sinov bo‘ldi.
Shunga qaramay, sportchilarimiz O‘zbekiston sharafini munosib himoya qildilar.
To‘liq IRONMAN masofasida SUPERSPORT Uzbekistan jamoasining 10 nafar ishtirokchisidan 9 nafari marraga yetib keldi. Ayniqsa, Shavkat Alimovning marrani zabt etgani alohida ramziy ahamiyatga ega bo‘ldi — u 60 yoshida o‘zining ilk to‘liq IRONMAN masofasini muvaffaqiyatli yakunladi.
Jamoaning olti nafar ishtirokchisi uchun ushbu start ularning hayotidagi ilk IRONMAN musobaqasi bo‘ldi. Bu O‘zbekistonda havaskorlar triatlonini rivojlantirish yo‘lidagi yana bir muhim natija — hamjamiyatimiz safi birdaniga 6 nafar yangi IRONMAN masofasini yakunlagan sportchilar bilan to‘ldi.
Ertasi kuni esa IRONMAN 70.3 starti bo‘lib o‘tdi. Kuchli shamol va yomg‘ir davom etayotganiga qaramay, O‘zbekiston sharafini himoya qilgan barcha sportchilar masofani muvaffaqiyatli yakunladilar.
Andrey Sharipov alohida natija qayd etdi. U 40–44 yosh toifasida 1-o‘rinni egallab, 4:17:28 natija ko‘rsatdi va 2027-yilda AQShda bo‘lib o‘tadigan IRONMAN 70.3 Jahon chempionatiga yo‘llanmani qo‘lga kiritdi.
Alohida ta’kidlash kerakki, ushbu startda chinakam jamoaviy qo‘llab-quvvatlash muhiti hukm surdi. Ertasi kuni startga chiqishi kerak bo‘lgan ishtirokchilar kechgacha trassada qolib, to‘liq IRONMAN masofasida ishtirok etayotgan jamoadoshlarini butun poyga davomida qo‘llab-quvvatladilar.
Startning yana bir muhim qismi Tallinda yashab, mehnat qilayotgan yurtdoshlarimizning qo‘llab-quvvatlashi bo‘ldi. Musobaqada O‘zbekistonlik sportchilar ishtirok etayotganini bilgan yurtdoshlarimiz bayroqlar, issiq choy va yomg‘irpo‘shlar bilan jamoamizni qo‘llab-quvvatlash uchun kelishdi.
