O'zbekistonlik para taekvondochilar Osiyoda tengsiz
Malayziyaning Kuching shahrida para taekvondo bo‘yicha navbatdagi Osiyo chempionati bo‘lib o‘tdi.
Unda qit'amizning 22 ta davlatidan jami 180 ga yaqin para taekvondochi ishtirok etdi. Musobaqada O‘zbekiston milliy terma jamoasining 17 nafar vakili ham medallar uchun kurash olib bordi.
Paralimpiya o‘yinlari uchun muhim reyting ochkolarini taqdim etuvchi ushbu Osiyo chempionatida yurtdoshlarimiz 3 ta oltin, 4 ta kumush va 3 ta bronza, jami 10 ta medalni qo‘lga kiritgan holda umumjamoa hisobida birinchi bo‘ldi va yana bir bor qit'amizning eng kuchli jamoalaridan ekanini isbotladi.
Osiyo chempionati oltin medali Zuhroddin To‘hirov (63 kg), Umida Mamarajabova (52 kg) va Roziya Ergashovaga (65 kg) nasib etgan bo‘lsa, MuhammadSodiq Usmonov (58 kg), Asadbek Toshtemirov (+80 kg), Qizlarkhon Isomidinova (47 kg) hamda Karomat Rustamova (52 kg) kumush medalga ega chiqdi.
Shuningdek, Qudrat Haydarov (63 kg), Qudratillo Sunnatov (70 kg) va Sog‘diyona Normuminova (+65 kg) shohsupaning uchinchi pog‘onasidan joy oldi.
