Og'ir atletika. O‘zbekiston chempionatining dastlabki kuni yakunlandi
Qarshi shahrida o‘tkazilayotgan o‘smirlar va kichik o‘smirlar o‘rtasidagi O‘zbekiston chempionatining birinchi kuni muvaffaqiyatli yakunlandi.
Musobaqaning dastlabki kunida kichik o‘smir qizlar o‘rtasida -36 kg va -44 kg, shuningdek kichik o‘smir yigitlar o‘rtasida -40 kg vazn toifalarida g‘olib va sovrindorlar nomi aniqlandi. Bellashuvlar raqobat va kurashlarga boy tarzda o‘tdi.
Kunning ikkinchi yarmida chempionatning tantanali ochilish marosimi bo‘lib o‘tdi. Unda Qashqadaryo viloyati sport boshqarmasi boshlig‘i Vahob Ro‘ziyev, Qarshi olimpiya va paralimpiya sport turlariga tayyorlash markazi direktori Abdulatif Rahimov, sportchi yoshlar hamda federatsiya mutasaddi vakillari ishtirok etishdi. Tadbirda so‘zga chiqqanlar barcha sportchilarga omad tilab, bunday musobaqalar yosh avlodni sportga keng jalb etish va ularning mahoratini oshirishda muhim o‘rin tutishini ta’kidladilar.
Shuningdek, ushbu chempionat joriy yil avgust oyida Toshkent shahrida o‘tkazilishi rejalashtirilgan yoshlar va o‘smirlar o‘rtasidagi Osiyo chempionati hamda “Yangi O‘zbekiston Olimpiya cho‘qqilari” musobaqalari uchun muhim saralash bosqichi hisoblanishi qayd etildi.
Mutaxassislar mamlakatimizda og‘ir atletika sporti izchil rivojlanib borayotganini, ayniqsa so‘nggi yillarda qizlar ishtirokining sezilarli darajada ortib borayotganini alohida e’tirof etishdi.
Kun yakunida o‘z vazn toifalarida g‘olib va sovrindor bo‘lgan sportchilar medal, diplom hamda esdalik sovg‘alari bilan taqdirlandilar.
