Gurlan tumanida ilk bor belbog‘li kurash bo‘yicha 2009-2010 yillarda tug‘ilgan o‘g‘il bolalar va qizlar o‘rtasida O‘zbekiston chempionati bo‘ladi
Xabaringiz bor, 20-23 aprel kunlari Xorazm viloyatining Gurlan tumanida ilk bor belbog‘li kurash bo‘yicha 2009-2010 yillarda tug‘ilgan o‘g‘il bolalar va qizlar o‘rtasida O‘zbekiston chempionati bo‘lib o‘tadi. Ayni paytda esa mamlakatimizning barcha hududlaridan polvonlar Gurlan tumanida jam bo‘lishgan.
Ertaga 21 aprel kuni start oladigan mazkur mamlakat chempionati oldidan bugun Gurlandagi sport majmuada sportchilarni tarozidan o‘tkazish, qur’a tashlash marosimi va murabbiy va hakamlar ishtirokida musobaqani munosib tarzda o‘tkazish yuzasidan yig‘ilish bo‘lib o‘tdi.
O‘zbekiston belbog‘li kurash federatsiyasi bosh kotibi, musobaqa bosh hakami Abduxalil Malikov, Xorazm viloyati belbog‘li kurash federatsiyasi raisi, musobaqa bosh kotibi Bekbergan Boltayev boshchiligida o‘tkazilgan mazkur yig‘ilishda asosan tartib—intizom, har bir bellashuv jarayonlarini adillik va halollik bilan boshqarish kabi jihatlar ta’kidlab o‘tildi.
Eslatib o‘tamiz chempionatda o‘g‘il bolalar belbog‘li kurashning erkin va klassik yo‘nalishlarida 13 ta vazn toifasida kuch sinashishsa, qizlar erkin yo‘nalishda 8 ta vazn toifasida bellashishadi.
