CAVA U18 Beach Volleyball Championship — yorqin lahzalar bilan yakunlandi
CAVA U18 Beach Volleyball Championship — yorqin lahzalar bilan yakunlandi
Yurtimizda ilk bor mezbonlik qilingan CAVA U18 (ayollar va erkaklar) o‘rtasidagi sohil voleyboli chempionati yuqori saviyada tashkil etilib, unutilmas o‘yinlar va keskin bahslar bilan yakuniga yetdi. Ikki kun davom etgan musobaqa yosh sportchilarning mahorati, irodasi va g‘alabaga bo‘lgan intilishini namoyon etgan haqiqiy sport bayramiga aylandi.
Yakuniy taqdirlash marosimida Sport vaziri o‘rinbosari Avazjon Karimov Qudratillayevich, O‘zbekiston voleybol federatsiyasi raisi o‘rinbosari Jamshid Shukrulloyevich Fayziyev, federatsiya bosh kotibi Farhod Alimov hamda soha mutasaddilari ishtirok etib, g‘olib va sovrindor jamoalarni munosib e’tirof etdilar. G‘oliblar medal va diplomlar bilan taqdirlandi.
Musobaqa natijalari quyidagicha:
Erkaklar o‘rtasida:
1-o‘rin — Qozog‘iston
2-o‘rin — Eron-1
3-o‘rin — Eron-2
Ayollar o‘rtasida:
1-o‘rin — Qozog‘iston-1
2-o‘rin — O‘zbekiston-1
3-o‘rin — Qozog‘iston-2
🇺🇿 Ayniqsa, ayollar jamoamizning ishtiroki alohida e’tiborga loyiq bo‘ldi. Sportchi qizlarimiz kuchli raqiblar qarshisida ishonchli o‘yin namoyish etib, faxrli ikkinchi o‘rinni qo‘lga kiritdilar. Bu natija nafaqat quvonarli, balki yurtimizda sohil voleybolining izchil rivojlanib borayotganining yaqqol isbotidir.
Chempionat yosh iste’dodlar uchun katta tajriba maktabi bo‘lib xizmat qildi. Eng muhimi, ushbu turnir orqali O‘zbekiston yana bir bor xalqaro sport maydonida o‘z imkoniyatlarini namoyon etdi.
