Yuriy Syomin: Fayzullaevning transferi CSKA uchun yo‘qotish, lekin uning o‘zi uchun to‘g‘ri qaror
Rossiya terma jamoasining sobiq murabbiyi Yuriy Syomin o‘zbekistonlik futbolchi Abbosbek Fayzullaevning Moskva CSKA jamoasidan Turkiyaning "Istanbul Bashakshehir" klubiga o‘tishi haqida o‘z fikrini bildirdi.
Syominga ko‘ra, Fayzullaevning ketishi CSKA uchun sezilarli yo‘qotish bo‘ladi, chunki u futbolchining o‘yinini juda yoqtirgan. Uning ta’kidlashicha, ushbu transfer kutilgan holat, sababi Abbosbek bilan avvaldan ma’lum kelishuvlar mavjud bo‘lgan.
Yuriy Syominning fikricha, Fayzullaev CSKA safida o‘zini yaxshi tomondan ko‘rsata oldi va kelajakda yanada o‘sish uchun yaxshi salohiyatga ega. Uning fikricha, bu futbolchining o‘zi uchun ham to‘g‘ri qaror, chunki "Bashakshehir"da u muntazam o‘yin amaliyotiga ega bo‘lishi mumkin. Kelajakda esa yanada yirik klublarga o‘tishi ehtimoli bor. Shu bois, Syomin mazkur transferni mantiqiy va to‘g‘ri deb hisoblaydi.
Avvalroq Fayzullaevning "Istanbul Bashakshehir"ga 7 million yevro evaziga o‘tayotgani haqida xabarlar tarqalgan edi.
