YChL. Muddatidan avval 1/8 finalga yoʻllanma olgan ikkinchi jamoa nomi maʼlum boʻldi
Myunxenning «Bavariya» klubi Chempionlar ligasining joriy mavsumida 1/8 final yo‘llanmasini muddatidan avval qo‘lga kiritgan ikkinchi jamoaga aylandi.
21 yanvardan 22 yanvarga o‘tar kechasi bo‘lib o‘tgan umumiy bosqichning 7-tur uchrashuvida myunxenliklar o‘z maydonida Belgiyaning «Yunion» klubini 2:0 hisobida mag‘lub etishdi. Ushbu g‘alabadan so‘ng nemis jamoasi 7 o‘yinda 18 ochko jamg‘arib, 36 ta klub ishtirok etayotgan umumiy turnir jadvalida ikkinchi o‘rinni egallab turibdi.
Natijada «Bavariya»ni 1/16 final zonasidan (9–24-o‘rinlar) kamida besh ochko ajratib turibdi. E’tiborlisi, umumiy bosqich yakuniga atigi bir tur qolgan.
Avvalroq Londonning «Arsenal» klubi ham muddatidan oldin top-8 ga kirishni kafolatlab, 1/8 final yo‘llanmasini qo‘lga kiritgandi. «Kanonirlar» hozirda 7 o‘yindan 7 g‘alaba (21 ochko) bilan Chempionlar ligasi umumiy jadvalida yetakchilik qilmoqda.
