Tiago Silva Yevropaga qaytmoqchi — Romano
«Fluminense» klubi himoyachisi, 41 yoshli braziliyalik Tiago Silva yana Yevropaga qaytishi mumkin. Bu haqda jurnalist Fabritsio Romano X ijtimoiy tarmog‘ida xabar berdi.
Manbaga ko‘ra, tajribali futbolchi Yevropaga erkin agent maqomida o‘tish variantini ko‘rib chiqmoqda. Silva oilasiga yaqinroq bo‘lishni istamoqda va aynan Yevropa uning uchun asosiy ustuvor yo‘nalish hisoblanadi.
Tiago Silva 2024 yildan buyon «Fluminense» safida to‘p surib kelmoqda. Uning klub bilan tuzgan amaldagi shartnomasi 2026 yilga qadar mo‘ljallangan. Faoliyati davomida himoyachi «Chelsi», «PSJ», «Milan», «Portu» hamda boshqa bir qator klublar sharafini himoya qilgan.
Joriy mavsumda Tiago Silva barcha musobaqalarda 46 ta uchrashuvda maydonga tushib, 4 ta gol va 1 ta golli uzatma muallifi bo‘ldi.
