Ronaldu «Al-Nasr»ni tark etishi mumkin
“Al-Nasr”ning portugaliyalik hujumchisi Krishtianu Ronaldu klubning hozirgi maqomidan norozi bo‘lgani sababli Saudiya Arabistonini tark etishi mumkin.
Record nashrining xabariga ko‘ra, hujumchini sotib olish narxi 50 million yevroni tashkil qiladi va MLS hamda Yevropa uning faoliyatini davom ettirishi uchun ehtimoliy variantlar sifatida ko‘rilmoqda.
Manbaga ko‘ra, Krishtianu Ronaldu 2023-yilda mamlakatning to‘rtta asosiy klubi: “Al-Nasr”, “Al-Hilol”, “Al-Ittihod” va “Al-Ahli” aksiyalarining nazorat paketini qo‘lga kiritgan hukumat organi — Saudiya Arabistoni Suveren boylik jamg‘armasi (PIF) tomonidan “Al-Nasr”ga nisbatan ko‘rsatilayotgan munosabatdan norozi.
Portugaliyalik futbolchi “Al-Nasr” jamg‘arma tomonidan boshqarilayotgan boshqa klublarga nisbatan transfer bozorida faol ishtirok eta olmayotganidan norozi. Uning fikricha, PIF “Al-Nasr” jamoasining chempionlikni qo‘lga kiritishiga yo‘l qo‘ymaslik uchun yangi o‘yinchilarni xarid qilishga to‘sqinlik qilmoqda. Hozirda “Al-Nasr” “Al-Hilol”dan atigi bir ochkoga ortda qolmoqda va chempionlik uchun kurashda davom etmoqda.
