Rasman: Adama Traore — «Vest Hem» futbolchisi
Angliyaning «Vest Hem Yunayted» klubi o‘z rasmiy saytida «Fulhem» hujumchisi Adama Traore transferini e’lon qilib, muxlislarini xushnud etdi. Londonliklar ispaniyalik vinger bilan shartnoma imzolanganini rasman tasdiqlashdi.
30 yoshli futbolchi «bolg‘achilar» safiga noma’lum mablag‘ evaziga ko‘chib o‘tdi. Ushbu transferning asosiy jihati shundaki, Traore o‘ziga yaxshi tanish bo‘lgan murabbiy — Nunu Eshpiritu Santu ixtiyoriga qaytdi. Avvalroq bu duet «Vulverxempton»da muvaffaqiyatli hamkorlik qilgan edi.
Klub bayonotida Adama Traorega yuqori baho berilgan: «Kuchli, tezkor, vaziyatlar yaratish va gol urishga qodir bo‘lgan Adama — Premer-liganing haqiqiy sinovidan o‘tgan o‘yinchi. U Nununing hujumkor jamoasiga tajriba va yuqori sifat qo‘shishi shubhasiz».
«Barselona»ning mashhur akademiyasi tarbiyalanuvchisi bo‘lgan Traore 2015 yilda «Aston Villa» orqali Angliya chempionatiga qadam qo‘ygan edi. Shundan buyon u APLda jami 262 ta o‘yinda maydonga tushib, «Aston Villa», «Midlsbro», «Vulverhempton» va «Fulhem» kabi klublar safida 14 ta gol hamda 25 ta samarali uzatmani o‘z hisobiga yozdirib qo‘yishga ulgurgan.
