Raneri ketmoqda — Shomurodovni nima kutyapti?
Italiya futboli mavsumi yakunlanayotgan bir paytda muhim yangiliklardan biri — 73 yoshli Klaudio Raneri murabbiylik faoliyatini rasmiy ravishda yakunlayotgani bo‘ldi. Ayni paytda “Roma”da intizom va natijalarni qayta tiklagan mutaxassis yozda jamoani tark etadi. Bu nafaqat hurmat uyg‘otadigan voqelik, balki jamoa va ayniqsa o‘zbek hujumchisi Eldor Shomurodovning kelajagi borasida jiddiy savollar tug‘diradi.
So‘nggi mavsumlarda “Spezia” va “Kalyari”dagi ijaralar hamda cheklangan o‘yin amaliyoti tufayli Shomurodovning “Roma”dagi faoliyati tugaydi degan fikrlar paydo bo‘lgandi. Biroq Raneri kelishi barcha narsani o‘zgartirdi — u Eldorga yana asosiy tarkibdan o‘rin berdi, unga ishondi va hujumdagi o‘yin tizimida muhim rolni topshirdi. Eldor gollar urish bilan birga, jamoaviy harakatlarda faol ishtirok etdi, paslar uzatdi, ochildi, kurashdi.
Endilikda esa Ranerining ketishi — Shomurodov uchun uzoq vaqtda tiklangan mavqeni yo‘qotish xavfini yuzaga chiqarmoqda. Shu bois, yangi bosh murabbiyning kim bo‘lishi nafaqat klub, balki Eldorning kelajagi uchun ham hal qiluvchi ahamiyat kasb etadi.
