«PSJ»ning 32 oʻyinlik magʻlubiyatsiz seriyasi yakunlandi
«PSJ» so‘nggi 12 yil ichida ilk bor Chempionlar ligasida Yevropaning top-5 chempionatlariga (Angliya, Germaniya, Ispaniya, Italiya, Fransiya) kirmaydigan klubga mag‘lub bo‘ldi. Bu haqda Opta statistik portali xabar berdi.
20 yanvardan 21 yanvarga o‘tar kechasi Parij klubi Chempionlar Ligasi umumiy bosqichining 7-turida safarda Lissabonning «Sporting» jamoasiga 1:2 hisobida imkoniyatni boy berdi.
«PSJ» bundan avval Chempionlar ligasida top-5 ligalardan tashqaridagi klubga 2013 yil dekabr oyida mag‘lub bo‘lgan edi.
O‘shanda parijliklar yana Portugaliya vakiliga — Lissabonning «Benfika» jamoasiga 1:2 hisobida yutqazgandi.
«Sporting»dan uchralgan mag‘lubiyatgacha «PSJ»ning Chempionlar Ligasida top-5 ligalarga kirmaydigan klublarga qarshi mag‘lubiyatsiz seriyasi 32 ta uchrashuvni tashkil etgan edi.
