«PSJ» Mbappega qarshi ish boʻyicha sud qarorining toʻliq matnini eʼlon qildi
Fransiyaning «Pari Sen-Jermen» klubi sobiq hujumchisi Kilian Mbappe bilan bog‘liq huquqiy nizo yuzasidan chiqarilgan sud qarorining to‘liq matnini o‘z rasmiy saytining bosh sahifasiga joylashtirdi. PSG Report nashri tarqatgan ma’lumotga ko‘ra, e’lon qilingan rasmiy materiallarda klub o‘zining sobiq futbolchisi oldidagi barcha moliyaviy majburiyatlarini to‘liq bajargani qayd etilgan.
Mazkur mojaroning tahliliy tafsilotlariga ko‘ra, avvalroq L’Equipe nashri parijliklar Mbappega to‘lanishi kerak bo‘lgan 60,9 million yevro miqdoridagi mablag‘ning 59 million yevrosini o‘tkazib bergani haqida xabar bergan edi. Shuningdek, «PSJ» rahbariyati futbolchi bilan muzokara olib borib, sud qarori matnini klub saytida bir oy davomida saqlash talabidan voz kechishini so‘ragani, biroq yakunda ushbu shartni bajarishga majbur bo‘lgani aytilmoqda.
Klub mutasaddilari Mbappega tegishli barcha mablag‘lar to‘langanini da’vo qilib, yuzaga kelgan tafovutni ish haqidan ushlab qolingan ijtimoiy badallar bilan izohlashgan. Shunga qaramay, vaziyatdan xabardor mustaqil manbalar klubning ushbu vajiga shubha bilan qaramoqdalar.
Eslatib o‘tamiz, Kilian Mbappe o‘tgan yilning yozida erkin agent maqomida «PSJ»dan Madridning «Real» klubiga o‘tgan edi, biroq tomonlar o‘rtasidagi moliyaviy kelishmovchiliklar hanuzgacha davom etmoqda.
