O‘rtoqlik o‘yini. O‘zbekiston Koreya Respublikasiga imkoniyatni boy berdi
O‘zbekiston milliy terma jamoasi FIFA kunlari doirasidagi o‘rtoqlik uchrashuvida Koreya Respublikasiga qarshi maydonga tushdi. Yongin shahridagi “Mireu” stadionida o‘tgan bahs mezbonlarning 2:0 hisobidagi g‘alabasi bilan yakunlandi. Koreyaliklar har ikki bo‘limda bittadan gol urib, uchrashuv taqdirini o‘z foydasiga hal qildi.
Bahsning 6-daqiqasida Son Hyong Min O‘zbekiston darvozasini ishg‘ol qilib, jamoasini oldinga olib chiqdi. Erta o‘tkazib yuborilgan goldan so‘ng vakillarimiz hisobni tenglashtirishga harakat qildi, biroq birinchi bo‘limda yaratilgan vaziyatlardan unumli foydalana olmadi. Tanaffusga mezbonlarning bir to‘plik ustunligi bilan chiqildi.
Ikkinchi bo‘limda O‘zbekiston terma jamoasi hujumdagi faollikni oshirishga urindi, ammo 60-daqiqada O Se Xun Koreya Respublikasining ikkinchi golini kiritdi. Shundan so‘ng vakillarimiz hisobni qisqartirish uchun oldinga intildi, biroq yakuniy daqiqalarga qadar raqib darvozasini ishg‘ol qila olmadi. Uchrashuv 2:0 hisobida yakunlandi.
Ma’lumot uchun, ushbu bahs O‘zbekiston milliy terma jamoasining joriy FIFA kunlari doirasidagi so‘nggi uchrashuvi bo‘ldi. Fabio Kannavaro boshchiligidagi jamoa avvalgi ikki bahsda Eronni 3:1, Suriyani 4:1 hisobida mag‘lub etgan edi. Koreya Respublikasiga qarshi uchrashuv esa terma jamoamizning ushbu xalqaro tanaffusdagi ilk mag‘lubiyati bo‘ldi.
