Navbahor navbatdagi o‘rtoqlik bahsida alamli mag‘lubiyatga uchradi
Navbatdagi o‘rtoqlik bahsida alamli mag‘lubiyat
Ma’lumot berganimizdek, “Navbahor” Turkiyadagi o‘quv-mashg‘ulot yig‘ini doirasidagi navbatdagi xalqaro o‘rtoqlik bahslarini bugun Rossiyaning “Baltika” (Baltika) va Qozog‘istonning “Aktobe” (Aktobe) jamoalariga qarshi o‘tkazishni rejalashtirgandi.
Ta’kidlaganimizdek, rossiyaliklar bilan bo‘ladigan uchrashuv noqulay ob-havo hamda maydon sifatsiz holatga kelganligi bois, qoldirildi.
Qozog‘istonliklarga qarshi kechadigan bellashuv esa o‘tkazildi. Mazkur o‘yinda jamoamiz bosh murabbiyi Timur Kapadze maydonga quyidagi futbolchilarni tushirdi: O‘tkir Yusupov, Anri Chichinadze, Umar Adhamzoda, Quvondiq Ro‘ziyev, Shohmalik Komilov, Shohruh Abdurahmonov, Abbosjon G‘ulomov, Vanya Ilich, Ruslanbek Jiyanov va ko‘rikdagi yana 2 nafar futbolchi.
Zaxiradan maydonga tushganlar: Muhammadali Usmonov, Zafarbek Rahimjonov hamda ko‘rikdagi futbolchi.
Ushbu uchrashuvda “Aktobe” bellashuvning so‘nggi, ya’ni, 90-daqiqasida zaxiradan maydonga tushirilgan yarim himoyachi Ayan Baydeulatovning goli evaziga 1:0 hisobida g‘alaba qozondi.
“Lochinlar” Turkiya yig‘ini doirasidagi so‘nggi o‘yinni 16 fevral kuni Gruziyaning sovrindor jamoalaridan biri bo‘lgan “Dinamo” (Tbilisi)ga qarshi o‘tkazishadi.
