Luka Modrich operatsiya qilindi
«Milan» va Xorvatiya terma jamoasi yarimhimoyachisi Luka Modrich Italiya A Seriyasining 34-turidan o‘rin olgan «Yuventus»ga (0:0) qarshi o‘yinda olgan jarohatidan so‘ng operatsiya qilindi.
Jamoalar Milandagi «San-Siro (Juzeppe Meatssa)» stadionida bahs olib borishgan edi. Uchrashuvda Simone Sodza bosh hakam sifatida faoliyat yuritgan.
Jarrohlik amaliyoti Milandagi «La Madonnina» klinikasida bo‘lib o‘tdi. Futbolchining chap yanoq suyagidagi murakkab ko‘p sonli sinishni davolash uchun xirurgik aralashuv talab etildi. Doktor Luka Autelitano boshchiligidagi jamoa tomonidan, klub shifokorlari Stefano Madzsoni va Andrea Bulgeroni ishtirokida o‘tkazilgan operatsiya muvaffaqiyatli yakunlandi.
«Klub Lukaga yaqinlashib kelayotgan Jahon chempionati oldidan tezroq sog‘ayib ketishini tilaydi!» — deyiladi «Milan» rasmiy saytida e’lon qilingan xabarda.
