«Liverpul» Bellingem uchun «Real»ga 180 million yevro toʻlashga tayyor
«Liverpul» Madridning «Real» klubi yarimhimoyachisi Jud Bellingemni o‘z safiga qo‘shib olishga qiziqish bildirmoqda. Jurnalist Ekrem Konurning xabariga ko‘ra, ingliz klubi «qirollik klubi»ga futbolchi uchun 180 million yevro taklif qilishga tayyor.
Manbada qayd etilishicha, «Liverpul» allaqachon «Real» bilan dastlabki aloqalarni o‘rnatgan. Angliya klubi rahbariyati yarimhimoyada jamoani uzoq yillar davomida yetaklay oladigan yangi yetakchi futbolchi zarur, degan fikrda.
Shu bilan birga, «Liverpul»ning Bellingem bo‘yicha dastlabki so‘rovi rad etilgan. «Real» prezidenti Florentino Peres va klubning boshqa vakillari futbolchini sotish variantini qat’iyan inkor etgan. Madrid klubi Bellingemga munosib o‘rinbosar topish imkonsiz, deya hisoblamoqda.
Jud Bellingem «Real» safiga 2023 yil yozida kelib qo‘shilgan. Joriy mavsumda u barcha turnirlarda 22 ta uchrashuvda maydonga tushib, 5 ta gol va 4 ta golli uzatma muallifiga aylangan. Futbolchining Madrid klubi bilan amaldagi shartnomasi 2029 yil yoziga qadar mo‘ljallangan. Transfermarkt portaliga ko‘ra, Bellingemning bozor bahosi 160 million yevroni tashkil etadi.
