«Liverpul» Bastonini oʻz safiga qoʻshib olmoqchi
«Liverpul» Milanning «Inter» klubi markaziy himoyachisi Alessandro Bastonini o‘z safiga qo‘shib olishga qiziqish bildirmoqda. Italiyalik futbolchi Angliya Premer-ligasiga ko‘chib o‘tishga qarshi emas. Bu haqda TEAMtalk xabar bermoqda.
Manbaga ko‘ra, «qizillar» safidagi 19 yoshli himoyachi Jovanni Leonining jarohati hamda Mark Gehining «Kristal Pelas»dan «Manchester Siti»ga transferi amaldagi APL chempionini himoya chizig‘ini kuchaytirish haqida o‘ylashga majbur qilgan. Mersisayd klubi «Inter»dan Alessandro Bastoni va Dortmundning «Borussiya»sida to‘p surayotgan Niko Shlotterbek variantlarini ko‘rib chiqmoqda.
Joriy mavsumda Bastoni barcha musobaqalarda 24 ta uchrashuvda maydonga tushib, bitta gol va beshta golli uzatma muallifi bo‘ldi. Futbolchining «Inter» bilan tuzgan amaldagi shartnomasi 2028 yil yozigacha mo‘ljallangan. Transfermarkt portaliga ko‘ra, Bastonining bozor qiymati 80 mln yevroni tashkil etadi.
