«Kattaqoʻrgʻon» klubiga «Metallurg»ga qarshi bahs uchun texnik magʻlubiyat yozildi
Bugun, 8 oktabr kuni Proliganing 21-turi doirasida «Kattaqoʻrgʻon» va «Metallurg» jamoalari oʻrtasidagi bahs boʻlib oʻtishi kerak edi. Bellashuv Samarqanddagi «Afrosiyob» stadionida soat 16:00 ga belgilangan.
Bahsga har ikki jamoa va ularning rasmiylari oʻz vaqtida yetib kelgan. Biroq tez tibbiy yordam mashinalari hamda xavfsizlik uchun masʼul organlarning kechikishi sababli bahsni belgilangan vaqtda boshlashning imkoni boʻlmagan.
Proliga reglamentining 15.18-bandiga koʻra, bunday vaziyatlarda bahs komissari 30 daqiqa kutganidan soʻng mezbon jamoaga texnik magʻlubiyat yozish huquqiga ega. Shuningdek, «Afrosiyob» stadionidagi yoritish tizimi professional futbol bahslarini oʻtkazish talablariga javob bermaydigan holatda boʻlgani aniqlangan.
Shu sababli bahs komissari «Kattaqoʻrgʻon»ga 0:3 hisobidagi texnik magʻlubiyat, «Metallurg»ga esa xuddi shu hisobdagi texnik gʻalaba yozish haqida qaror qabul qilgan. Qaror Proliga reglamenti talablari asosida chiqarilgan.
