Ispaniya Kubogi. «Barselona» qiyinchilik bilan «Albasete»ni magʻlub etib, yarimfinalga yoʻllanma oldi
Ispaniya Kubogining 1/4 final bosqichi doirasida mamlakatning ikkinchi divizioni vakili «Albasete» o‘z maydonida amaldagi chempion «Barselona»ni qabul qildi. «Karlos Belmonte» stadionida kechgan bahs kataloniyaliklarning 2:1 hisobidagi qiyin g‘alabasi bilan yakunlandi.
O‘yinni boshqarib borgan hakam Xose Munuera Montero uchrashuv davomida bir necha bor keskin vaziyatlarga guvoh bo‘ldi. Mehmonlar safida 39-daqiqada yosh yulduz Lamin Yamal hisobni ochgan bo‘lsa, ikkinchi bo‘limning 56-daqiqasida himoyachi Ronald Arauxo hisobdagi farqni oshirdi.
Mezbonlar taslim bo‘lishmadi va 87-daqiqada Xavi Moreno orqali bitta javob goli urishga muvaffaq bo‘lishdi, biroq muvozanatni tiklash uchun ularga vaqt yetmadi.
«Albasete» turnirning haqiqiy sensatsiyasiga aylangan edi: ular 1/8 finalda Madridning «Real» klubini (3:2) musobaqadan chiqarib yuborishgan. «Barselona» esa yarimfinal yo‘lida avvalgi bosqichda «Rasing»ni (2:0) mag‘lub etgan edi.
Qayd etish joizki, Kataloniya klubi ushbu turnirning amaldagi g‘olibi hisoblanadi. 2025 yil 26 apreldagi finalda «Barselona» Madridning «Real» klubini qo‘shimcha vaqtlarda 3:2 hisobida taslim etgan edi.
Ispaniya Kubogi. 1/4 final
«Albasete» — «Barselona» 1:2
Gollar: Moreno (87) — Yamal (39), Arauxo (56).
