Islom Ismoilov: “Natijadan xursandman, biroq o‘yin sifatidan qoniqmadim”
Oʻzbekiston U-17 terma jamoasi bosh murabbiyi Islom Ismoilov uchrashuvdan so‘ng o‘z fikrlarini bildirib o‘tdi:
“Dastlabki uchrashuv bo‘lgani bois, yigitlarda hayajon sezildi. Bu yoshdagi futbolchilarda, yuqori darajadagi turnirda birinchi bor ishtirok etayotganliklari bois, shunday holat kuzatilishi tabiiy. Birinchi bo‘limni yaxshi boshladik. O‘yin avvalida tezkor gol kiritishga muvaffaq bo‘ldik. Shundan so‘ng futbolchilarimiz hotirjamlikka berilishdi, bu o‘yinga ta’sir qildi. Himoyadan hujumga o‘tishda muammolar yuzaga keldi. Natijada raqibimiz gol urib ketdi. Ikkinchi taymda bir qator o‘zgarishlarga qo‘l urib, kamchiliklarni bartaraf etishga harakat qildik va g‘alabani mustahkamladik. Natijadan xursandman, biroq o‘yin sifatidan qoniqmadim. Sababi biz bundan-da yaxshiroq o‘yin ko‘rsata olamiz. Bugungi uchrashuvni tahlil qilib, kelgusi o‘yinlarda sifatli futbol ko‘rsatishga harakat qilamiz”,-deydi Ismoilov
Eslatib o’tamiz U-17 terma jamoamiz osiyo chempionatining ilk bahsida Tayland terma jamoasini yirik 4:1 hisobida mag’lubiyatga uchratdi va Saudiya Arabistoni terma jamoasi bilan bir xil ochko to’plagan holda guruh peshqadamligini egallab turibdi.
