Igor Golban yangi mavsumni “Andijon” jamoasida boshlaydi
Seleksiya jarayonidagi navbatdagi transfer amalga oshirildi.
Bu yilgi chempionatni “Nasaf” safida yakunlagan tajribali himoyachi Igor Golban 2026-yilgi mavsumda “Andijon” sharafini himoya qiladi.
Tajribali himoyachi 1990-yilning 31-iyul kuni Rossiyaning Sochi shahrida tugʻilgan. Faoliyatini tabiiyki Rossiya chempionatida boshlagan. Jumladan, “Jemchujina”, “Sochi”, “Lokomotiv”, “Shinnik”, “Ximki”, Chexiyaning “Sigma” klublarida oʻynagan. 2015-yilda Oʻzbekistonga kelgan. Shu vaqt davomida yurtimizda “Qoʻqon-1912”, “Navbahor” va “Nasaf” jamoalarida toʻp surgan.
Oʻtgan yili mamlakat chempioniga aylangan va u ikki marta Superkubokni ham qoʻlga kiritgan.
Golban faoliyati mobaynida umumiy hisobda 420 ta oʻyinda maydonga tushgan va 27 ta gol urib, 8 ta golli pas bergan.
