Flik: «Jamoaning bir butun boʻlib harakat qilgani menga yoqdi»
«Barselona» bosh murabbiyi Hans-Diter Flik Ispaniya Superkubogi yarimfinalida «Atletik» jamoasiga qarshi kechgan va 5:0 hisobida yakunlangan uchrashuvdan so‘ng fikr bildirdi.
«Men uchun asosiy ustuvorlik — keyingi o‘yin. Shu bilan birga, bugun jamoa qilgan ishni qadrlayman, chunki «Espanyol»ga qarshi uchrashuvda biz yaxshi ko‘rinmagandik. Jamoaning bir butun bo‘lib harakat qilgani menga yoqdi. 5:0 hisobidagi g‘alaba — yaxshi natija, ammo bu atigi bitta o‘yin, finalda hammasi boshqacha bo‘ladi. Bugun biz o‘yinni nazorat qila oldik. Kerakli tempni topish uchun bir necha daqiqa vaqt ketdi. Shundan so‘ng yaxshi o‘ynadik. O‘yin davomida nazoratni saqlab qolganimizdan mamnunman: to‘pga egalik qildik va uchrashuv oxirigacha ishonchli himoyalandik, darvozamizni daxlsiz saqlab qoldik», — deya Flikning so‘zlarini keltiradi AS nashri.
Eslatib o‘tamiz, «Barselona» Ispaniya Superkubogi finaliga chiqdi. Hal qiluvchi bahs yakshanba kuni, 11 yanvarda bo‘lib o‘tadi. Kataloniyaliklarning raqibi Madrid derbisida — «Atletiko» va «Real» o‘rtasidagi uchrashuvda g‘alaba qozongan jamoa bo‘ladi.
