Fabio Kannavaro Olmaliqqa tashrif buyurdi
Superliganing markaziy uchrashuvi — OKMK FK va «Nasaf» jamoalari o‘rtasidagi (1:1) qizg‘in bahsni O‘zbekiston milliy terma jamoasi bosh murabbiyi Fabio Kannavaro bevosita stadiondan kuzatdi. Italiyalik mutaxassis Olmaliq shahridagi futbol muhitidan, muxlislarning faol qo‘llab-quvvatlashi va o‘yin sur’atidan katta taassurot olganini bildirdi.
Uchrashuv tanaffusida OKMK FK bosh direktori Bahodir Mirzayev mehmonni iliq kutib olib, Olmaliq-kon metallurgiya kombinatini aks ettiruvchi esdalik sovg‘alarini taqdim etdi. Shuningdek, Kannavaroni klubning kelgusi uy uchrashuvlariga ham tashrif buyurishga taklif qildi.
O‘z navbatida Fabio Kannavaro bugungi bellashuv yuqori saviyada tashkil etilganini, har ikki jamoaning o‘ziga xos o‘yin uslubi va g‘alabaga bo‘lgan ishtiyoqi muxlislar uchun zavqli tomoshani taqdim etganini ta’kidladi. U, shuningdek, O‘zbekiston futbolida yosh iste’dodlar soni ortib borayotganini, bu esa milliy terma jamoa istiqboli uchun muhim omil ekanini qayd etdi.
