Argentina terma jamoasi JCh-2026 uchun yangi muqobil formasini taqdim etdi
Amaldagi jahon chempioni — Argentina milliy terma jamoasi 2026 yili AQSH, Kanada va Meksika hududlarida bo‘lib o‘tadigan Jahon chempionati uchun mo‘ljallangan yangi muqobil liboslar to‘plamini rasman namoyish etdi.
Yangi forma dizayn jihatidan avvalgi namunalaridan sezilarli darajada farq qiladi. Libosning asosiy qora foni oq va och moviy ranglardagi to‘lqinsimon chiziqlar hamda boshqa o‘ziga xos elementlar bilan bezatilgan. Shuningdek, futbolkada Argentina futbol assotsiatsiyasining uchta yulduzli gerbi hamda 2022 yilgi Jahon chempionatidagi g‘alabaga bag‘ishlangan maxsus ramziy belgi aks ettirilgan.
Qura natijalariga ko‘ra, Argentina terma jamoasi «J» guruhidan joy oldi. Guruh bosqichi doirasida amaldagi chempionlar quyidagi jamoalarga qarshi bahs olib boradilar:
- Avstriya;
- Jazoir;
- Iordaniya.
Eslatib o‘tamiz, Argentina terma jamoasi amaldagi jahon chempioni hisoblanadi. 2022 yilda Qatarda bo‘lib o‘tgan mundial finalida argentinaliklar Fransiya terma jamoasi bilan kuch sinashgan edi. Dramatik kechgan uchrashuvning asosiy vaqti 3:3 hisobida yakunlangan, penaltilar seriyasida esa Argentina 4:2 hisobida g‘alaba qozonib, o‘z tarixidagi uchinchi chempionlikni qo‘lga kiritgan edi.
