A Seriya. «Napoli» o‘z maydonida «Fiorentina»ni magʻlub etdi
Italiya chempionatining 23-turidan o‘rin olgan «Napoli» hamda «Fiorentina» jamoalari o‘rtasidagi bahs yakunlandi. Neapoldagi afsonaviy «Diego Armando Maradona» stadionida kechgan uchrashuv mezbonlarning 2:1 hisobidagi g‘alabasi bilan nihoyasiga yetdi.
Rimlik hakam Federiko La Penna boshqarib borgan uchrashuvda hisob kutilmaganda darvozabonning uzatmasidan so‘ng ochildi. O‘yinning 11-daqiqasida «Napoli» posboni Aleks Meretning pasidan so‘ng yarimhimoyachi Antonio Vergara raqib darvozasini ishg‘ol qildi. Ikkinchi bo‘lim boshida, 49-daqiqada mezbonlar himoyachisi Migel Guterres hisobdagi farqni oshirishga muvaffaq bo‘ldi. Mehmonlar safida Manor Solomon 57-daqiqada gol urib, hisobni qisqartirgan bo‘lsa-da, «Fiorentina» muvozanatni tiklay olmadi.
Ushbu g‘alabadan so‘ng «Napoli» ochkolari sonini 46 taga yetkazib, turnir jadvalida uchinchi o‘rinni egallab turibdi. Neapolliklar peshqadam «Inter»dan 6 ochkoga ortda qolmoqda, biroq milanliklar hisobida bitta zaxira o‘yini bor. «Fiorentina» esa 17 ochko bilan hamon turnir jadvalining quyi qismida — 18-pog‘onada bormoqda.
