2026-yilda Oʻzbekiston media futbol ligasining ilk mavsumi oʻtkaziladi
Bugun Oʻzbekiston media futbol ligasining (United MFL) dastlabki mavsumiga bagʻishlangan konferensiya boʻlib oʻtdi. Tadbirda Sport vazirligi, Milliy Olimpiya qoʻmitasi hamda Oʻzbekiston futbol assotsiatsiyasi rahbariyati ishtirok etib, mamlakat sportida ilk bor amalga oshirilayotgan ushbu loyihani qoʻllab-quvvatlashini bildirdi.
Tashabbus hamyurtlarimiz orasida sogʻlom turmush tarzini targʻib etish, shuningdek, futbolga boʻlgan qiziqishni yanada oshirishga xizmat qiladi. Konferensiya davomida boʻlajak musobaqa haqida batafsil maʼlumot berildi.
Rejaga koʻra, chempionat 2026-yilning 1-mart kuni start olib, 14-iyuniga qadar davom etadi. Unda 16 jamoa ishtirok etadi. Shu bilan birga, kelgusida United MFL doirasida kubok bellashuvlarini tashkil etish ham koʻzda tutilgan.
