Navbahor Hamidova: Raqib tanlamayman
Ayollar terma jamoamizning yetakchi vakilasi, jahon kubogi sohibasi Navbahor Hamidova professional boksda ikkinchi jangini o‘tkazishi ma’lum bo‘ldi. U 11 aprel kuni Farg‘onada Farangiz Olimjonovaga qarshi ringga ko‘tariladi.
Biz ushbu jang haqida bokschimiz va ayollar terma jamoasi bosh murabbiyi Elshod Rasulovning fikrlari bilan qiziqdik.
- Elshod Navbahor uchun asosiy maqsad baribir 2028 yilgi Los -Andjelas Olimpiadasidagi muvaffaqiyatli ishtirok hisoblanadi. Professionaldagi faoliyat unga xalaqit bermaydimi?
- Yo‘q. Aksincha oraliq vaqt bo‘lganda bunday janglarni o‘tkazib turish zarar qilmaydi.
- Professional va havaskor boks o‘rtasida baribir farq bor. Hozirgi tayyorgarlik havaskor yo‘nalishga qaratilganligini inobatga olsak, qiyinchilik yuzaga kelmaydimi?
- Reyting janglari uchun ushbu tayyorgarlik yetarli deb o‘ylayman. Lekin jiddiy janglar, chempionlik bahslari uchun alohida hozirlik ko‘rish kerak bo‘ladi.
- Navbahor Dana Uaytga qarashli bo‘lgan Zuffa Boxing bilan shartnoma imzoladimi?
- Navbahor hamda Aziza Zokirovaga qiziqish bildirishgan. Bu borada ishlar olib borilyapti.
-Navbahor, professional boksda debyut jangingizni o‘tkazib ulgurdingiz. Bu yo‘nalishga moslashish qiyin kechmadimi?
- Endigina bitta jang o‘tkazdim. Hozircha biror fikr bildira olmayman. Lekin murabbiylarimning ko‘rsatmalarini to‘liq bajarishga harakat qildim. Shuning uchun qiyinchilikka uchramadim. Hali jiddiy janglar oldinda.
- Jiddiy janglar deganda qanday toifadagi raqibalaringiz bilan to‘qnashuvni nazarda tutyapsiz?
- Albatta, professional boksdagi chempionlarga qarshi to‘qnashuvni aytyapman.
- Demak, bu yo‘nalishda ham istalgani bilan jang qilishga tayyorsiz?
- Shubhasiz, men raqib tanlamayman!
-Rahmat, professional boksda ham chempionlik kamarlarini qo‘lga kiritishingizga tilakdoshmiz!
