EUBC Iman Helifning faoliyatini to'xtatish qarorini ijobiy baholadi
Yevropa boks konfederatsiyasi (EUBC) bosh kotibi Kirill Shchekutyev olimpia chempioni, jazoirlik Iman Helifning faoliyatini vaqtincha to'xtatish haqidagi yangilikka munosabat bildirdi.
Avvalroq sobiq murabbiyi va menejeri Nasser Yesfah, Helif Parij–2024 Olimpiadasidan so'ng mashg'ulotlarga qaytmaganini ma'lum qilgan edi. Eslatib o'tamiz, sportchi ishtirok etgan ushbu musobaqa katta bahs-munozaralarga sabab bo'lgan. Chunki undan bir yil oldin Xalqaro boks assotsiatsiyasi (IBA) uni gender testdan o'ta olmagani uchun jahon chempionatidan chetlatgan edi.
«Bu mavzuda izoh berishda ehtiyotkorlik kerak. Lekin men bu qarorni ijobiy baholayman. Helifsiz boks faqat yutadi. Shu vazn toifasidagi qizlar endilikda turli adolatsizliklarga duch kelmaydi», — dedi Shchekutyev intervyusida.
