Boks. O‘zbekiston va Qozog‘iston bokschilari ishtirokida bayram kechasi tashkil etildi
Xabaringiz bor, Toshkent katta xalqaro qo‘shma o‘quv-mashg‘ulot yig‘iniga mezbonlik qildi. Unda Qozog‘istonning birinchi va ikkinchi raqamli bokschilari, o‘zimizning terma jamoamiz vakillari bilan birgalikda mashg‘ulotlar olib borishdi.
Kuni kecha, ushbu yig‘in o‘z yakuniga yetdi. Ko‘taringki ruhda o‘tgan mashg‘ulotlar va sparinglar o‘zaro tajriba almashish uchun muhim imkoniyat bo‘ldi.
Yig‘in yakunida bo‘lsa, kecha mehmonlar uchun haqiqiy O‘zbekona mehmondo‘stlik sifatida bayram tadbiri tashkil etildi. Tadbirda, ikki davlat sportchilari va murabbiylar ishtirok etishdi.
Dasturxon yozilib, samimiy suhbatlar davom ettirildi. Sahnadagi xonandalar bo‘lsa davraga o‘zgacha shukuh bag‘ishladi.
Yakunda mehmon murabbiylar va bokschilar so‘zga chiqar ekan, iliq taassurotlar bilan ortga qaytayotganliklarini ta’kidlashdi.
Tadbir so‘nggida, Qozog‘istonlik sportchi va murabbiylarga esdalik sovg‘alari va zar choponlar topshirildi.
