Boks. Osiyo chempionatining chorak final bahslari yuqori saviya va keskin raqobat ostida davom etmoqda
Toshkent shahridagi Olimpiya shaharchasining zamonaviy “Yakkakurashlar” arenasida kichik o‘smirlar va o‘smirlar o‘rtasida boks bo‘yicha Osiyo chempionatining chorak final bahslari yuqori saviya va keskin raqobat ostida davom etmoqda.
Musobaqaning navbatdagi kungi bellashuvlarini kuzatish maqsadida O‘zbekiston boks federatsiyasi raisining birinchi o‘rinbosari, "Asian Boxing" tashkiloti vitse-prezidenti Saken Polatov hamda O‘zbekiston boks federatsiyasi Bosh kotibi, “Asian Boxing” tashkiloti musobaqalarni o‘tkazish komissiyasi raisi Shohid Tillaboyev yana bir bor arenaga tashrif buyurdi.
Tashrif davomida Saken Djettibayevich va Mirshohid Gapparjanovich chempionat doirasida o‘tayotgan murosasiz va shiddatli janglarni bevosita kuzatar ekan, musobaqaning tashkiliy ishlari, hakamlik jarayonlari hamda ishtirokchilar uchun yaratilgan shart-sharoitlar bilan ham yaqindan tanishib, ularga omad tiladi.
Shuningdek, u xalqaro va mahalliy hakamlar, tashkilotchilar hamda rasmiy shaxslar bilan uchrashib, yurtimizda yuqori darajada tashkil etilgan qit’a chempionatining borishi yuzasidan fikr almashdi.
Qayd etish joiz, Toshkent mezbonlik qilayotgan mazkur nufuzli musobaqa nafaqat yosh iste’dodlarni kashf etish, balki O‘zbekistonning xalqaro maydondagi nufuzini yanada mustahkamlashda ham muhim ahamiyat kasb etadi.
