Argentina unvonni saqlab qola oladimi? Iordaniya uchun asosiy vazifa – munosib ishtirok. J guruhi haqida nimalarni bilamiz?
Ushbu guruhda amaldagi chempion Argentina ishtirok etadi. Raqiblar unchalik kuchli emas – Avstriya, Iordaniya va Jazoir. Messi va uning jamoadoshlari guruhdan muammosiz keyingi bosqichga chiqishi mumkin. Ikkinchi o‘rin uchun esa Avstriya va Jazoir bahs olib boradi.
Argentina
Murabbiy
Lionel Skaloni tayinlanganda ko‘pchilik ishonchsizlik bilan qaragan edi, biroq u Argentinani yana dunyoning eng kuchli jamoalari qatoriga qaytardi. Endi esa milliy terma o‘z yurti muxlislari orasida "Skalonetta" nomini olgan.
Qizig‘i shundaki, jahon chempionati g‘alabasidan bir yil o‘tib, murabbiy jamoani tark etish haqida ham o‘ylagan – sababi, kutilmalar juda yuqori bo‘lib, doimiy bosim uni jismonan va ruhan holdan toydirgan edi.
Biroq yakunda Skaloni qoldi, ikkinchi bor Amerika Kubogini qo‘lga kiritdi va qiyin davrni yengib o‘tib, 2026-yilgi jahon chempionatigacha jamoani yetaklashni maqsad qildi.
Yulduzlar
Messi – izohga hojat yo‘q. Uning soyasida qolgan futbolchilar xuddi qirol atrofidagi saroy ahli kabi ko‘rinadi. Ammo bu jamoa oddiy fon emas, unda ham yorqin shaxslar yetarli.
Avvalo, darvozabon Emiliano Martines – o‘tgan jahon chempionati finalining qahramoni va eng yaxshi posbon. U allaqachon o‘zini ruhiy jihatdan jangga tayyorlagan:
«Odamlar Argentinani hisobdan chiqarishyaptimi? Biz bunga o‘rganib qolganmiz. Bu menga yoqadi. Men bundan zavqlanaman».
Maydondagi futbolchilardan uch nafarini alohida ta'kidlash lozim:
– yarim himoyaning yuragi Enso Fernandes;
– hujum markazi uchun kurashayotgan Xulian Alvares va Lautaro Martines.
Alvares "Barselona"ga o‘tishni istamoqda. Lautaro esa to‘rt yil avvalgi turnirdagi omadsizlik uchun revanj olmoqchi – o‘shanda u asosiy tarkibdagi o‘rnini boy bergan, doimiy og‘riq bilan o‘ynab, o‘z salohiyatini ko‘rsata olmagan edi.
Maqsad
So‘nggi besh yilda ishtirok etgan barcha turnirlarda (ikki Amerika Kubogi, JCH-2022 va Finalissima) g‘olib chiqqan jamoa uchun yagona maqsad – unvonni himoya qilish.
Yoshi kattalashib borayotgan tarkib bunga qodirmi? Katta ehtimol bilan – ha. Jamoa ancha tajriba to‘plagan. Agar 2021–2022-yillarda o‘yinda his-tuyg‘ular ustun bo‘lgan bo‘lsa, so‘nggi Amerika Kubogi sog‘lom "sintsizm" – mahorat va klass hisobiga yutib olindi. Kamida yarim finalga chiqishi kutilmoqda.
Chempionlik ehtimoli (Opta): 10,30%
Avstriya
Murabbiy
Ralf Rangnik ilgari milliy terma jamoalar bilan ishlamagan, asosan "Red Bull" tizimining ideologi sifatida tanilgan edi. Hatto "Manchester Yunayted"dagi qisqa faoliyati ham bu fikrni o‘zgartirmadi.
Biroq Avstriyada u yana kuchli murabbiy ekanini isbotladi va geggenpressing me'mori sifatida o‘zini ko‘rsatdi. U jamoaga bo‘lgan munosabatni o‘zgartirdi, muxlislar mehrini qaytardi va o‘yin uslubini ancha hujumkor hamda tomoshabop qildi.
Euro-2024da Avstriya Frantsiya, Niderlandiya va Polsha qatnashgan "o‘lim guruhi"da birinchi o‘rinni oldi. Pley-offda Turkiyaga yutqazish – faqat tajriba bo‘ldi. Endi 28 yillik tanaffusdan so‘nggi JCHda bu tajriba asqotishi mumkin.
Yulduzlar
Jamoaning asosiy yulduzlari – termaning sardori David Alaba va eng yaxshi to‘purar Mark Arnautovich. Bu chempionat ular uchun so‘nggi yirik turnir bo‘lishi mumkin.
Yangi avloddan esa 26 yoshli yarim himoyachi Kristof Baumgartner ajralib turadi. U 13 gol va 8 assist bilan "Leyptsig"ni Chempionlar ligasiga qaytardi va hozir unga APL klublari, jumladan "Aston Villa", shuningdek "Inter" va "Milan" qiziqmoqda.
Maqsad
Minimal vazifa – guruhdan chiqish. Bu amalga oshishi mumkin. Eng yuqori marrasi – pley-offning ikkinchi bosqichi.
Lekin bu yo‘l oson emas: agar ikkinchi o‘rin bilan chiqsalar, Avstriya darhol Frantsiyaga duch kelishi mumkin.
Chempionlik ehtimoli (Opta): 0,50%
Jazoir
Murabbiy
Vladimir Petkovich kelguniga qadar Jazoir o‘zgarishlarni kechiktirdi. Jamoa uzoq vaqt Jamel Belmadiga ishonch bildirdi, ammo taraqqiyot bo‘lmadi.
Petkovich kelgach, vaziyat o‘zgardi: Jazoir JCH saralashidan ishonchli o‘tdi va Afrika Kubogida yaxshi taassurot qoldirdi. Jamoa yana jonlandi, biroq Nigeriyaga qarshi chorak finalda kuch yetmadi.
Yulduzlar
Eng mashhur nom – Riyod Mahrez. 35 yoshda u hali ham yuqori darajada o‘ynay oladi, ammo avvalgidek barqaror emas. Himoyada tayanch figura – jarohatdan qaytgan Rami Bensebaini.
Yangi nomlardan:
– darvozaga da’vogar Luka Zidan;
– hujumda katta umid bog‘lanayotgan Amin Guiri.
Maqsad
Guruhdan chiqish va Avstriya bilan raqobatlashish. Hatto uchinchi o‘rin bilan ham keyingi bosqichga chiqish imkoni bor.
Chempionlik ehtimoli (Opta): 0,18%
Iordaniya
Murabbiy
Iordaniya o‘z tarixidagi eng yaxshi davrni boshdan kechirmoqda. Jamoa ilk bor Osiyo Kubogi finaliga chiqdi va JCHda debyut qilmoqda.
Murabbiylar almashinuvi jarayonida Jamal Sellami jamoani qabul qilib oldi va uni muvaffaqiyatli tarzda jahon chempionatiga olib chiqdi.
Yulduz
Yagona va asosiy yulduz – Musa Al-Tamari. U Yevropada muvaffaqiyatga erishgan ilk iordaniyalik futbolchi bo‘lib, Fransiya chempionatida ham o‘zini ko‘rsata oldi.
Maqsad
Jazoir bilan uchinchi o‘rin uchun kurashish. Avstriya va ayniqsa Argentina bilan raqobat qilish juda qiyin. Eng muhimi – munosib ishtirok etish.
Chempionlik ehtimoli (Opta): 0,04%
